Kosova & Rajoni

Ambasadori amerikan në Kosovë: Sulmi ishte i koordinuar dhe i sofistikuar! Sasia e armëve tregon se ishte plan për të destabilizuar sigurinë në rajon

Shtetet e Bashkuara kanë arritur në përfundimin se sulmi gjatë fundjavës nga terroristët serbë në veri të Kosovës, duke lënë të vdekur një polic kosovar, Afrim Bunjaku, kishte për qëllim destabilizimin e rajonit dhe paralajmëroi për përshkallëzimin e mëtejshëm të situatës midis dy armiqve të vjetër

Redaksia 27 Shtator 2023, 10:35 | Përditesimi: 27 Shtator 2023, 10:42

“Ne e dimë se ishte e koordinuar dhe e sofistikuar. Sasia e armëve sugjeron se kjo ishte serioze, me një plan për të destabilizuar sigurinë në rajon”, tha ambasadori i SHBA-së në Kosovë, Jeffrey M. Hovenier për median amerikane Politico, duke shtuar se personat e armatosur duket se kanë qënë të stërvitur ushtarakisht.

Policia e Kosovës tha se një grup prej rreth 30 serbësh të armatosur i zunë pritë një patrulle policie mëngjesin e së dielës, duke vrarë 1 polic dhe duke plagosur 3 të tjerë, përpara se të largoheshin dhe të strehoheshin në një manastir aty pranë.

LEXO EDHE:
Haxhi Shala pranon fajësinë para gjykatës në Hagë

Katër personat e armatosur u vranë në një shkëmbim zjarri me policinë dhe tre u arrestuan. Shumica e të armatosurve serbë arritën të dilnin fshehurazi nga manastiri dhe të arratiseshin në këmbë, thanë autoritetet e Kosovës.

Zyrtarët perëndimorë thanë se incidenti reflektoi rritjen e tensioneve gjeopolitike në Ballkan, pasi Rusia, e frustruar nga mbështetja e fortë e Europës për Ukrainën, po përpiqet të përdorë ndikimin e saj me aleatët në Serbi dhe gjetkë për të nxitur tensionet, veçanërisht në Bosnje dhe Kosovë.

Hovenier tha se SHBA duhet të përcaktojë ende nëse Serbia ishte përgjegjëse për sulmin, siç pretendon Kosova. Ai tha se SHBA nuk kishte arsye të dyshonte se armët dhe pajisjet e tjera që tregoi policia e Kosovës në një konferencë për shtyp të hënën nuk ishin ato që u gjetën në vendin e ngjarjes.

“Njerëzit që ne menduam se ishin më të përgjegjshëm janë njerëzit që qëlluan kundër oficerit të policisë së Kosovës”, tha Hovenier.

Presidenti serb Aleksandar Vuçiç mohoi se Beogradi ishte i përfshirë në sulm, duke këmbëngulur se ishte vepër e serbëve lokalë të Kosovës e provokuar nga kryeministri Albin Kurti.

Është e paqartë nëse personat e armatosur kërkuan konfrontimin me policinë e Kosovës të dielën apo po planifikonin një operacion afatgjatë dhe u përplasën me një skuadër të policisë së Kosovës, thanë zyrtarët perëndimorë.

BE dhe SHBA janë përpjekur për vite të tëra të ndërmjetësojnë një paqe të qëndrueshme midis Serbisë dhe Kosovës, por marrëveshja ka ngecur mbi statusin e Kosovës veriore, ku shumica e popullsisë është serbe.

Beogradi vazhdon ta konsiderojë Kosovën si një krahinë të shkëputur. Vendi shpalli pavarësinë në vitin 2008, gati një dekadë pasi një fushatë bombardimi të NATO-s që detyruan forcat serbe të tërhiqeshin nga rajoni.

Gjatë luftës rreth 10 mijë njerëz u vranë në Kosovë. Pavarësisht mosbesimit të thellë midis dy palëve, Hovenier tha se përpjekjet perëndimore për të arritur paqen duhet të vazhdojnë.

Duke e quajtur incidentin “jashtëzakonisht të pafat”, ai tha se shpresonte se do të “siguronte stimuj si në Beograd ashtu edhe në Prishtinë për të mbajtur marrëdhënie të mira fqinjësore”.

S.S/M.Q./Shqiptarja.com

TAG: