U kap me telefon në vesh në timon dhe tentoi të korruptojë efektivët, arrestohet 21 vjeçari në Tiranë! Gjatë këtij viti u goditën 10 raste të mitdhënies

Arrestohet në flagrancë 21 vjeçari Afrim Sena teksa ka tentuar të korruptojë punonjësit e policisë në Tiranë. I riu ka qenë duke folur në telefon gjatë drejtimit të makinës në rrugën “Imer Ndregjoni". Pasi është konstatuar nga policia, kjo e fundit e ka ndaluar me qëllim ndëshkimin me masë administrative.

Gjatë kryerjes së veprimeve 21 vjeçari me iniciale A. S., i ka ofruar punonjësit të policisë një kartëmonedhë me prerje 2000 lekë të rinj, me qëllim shmangien e ndëshkimit për shkeljen e kryer. Gjatë këtij viti, Policia Rrugore e Tiranës ka goditur 10 raste të mitëdhënies.

Njoftimi i policisë:

Policia Rrugore e Tiranës godet një tjetër rast të mitëdhënies. Vihet në pranga një 21-vjeçar, pasi tentojë të korruptojë punonjësit e Policisë Rrugore, për të shmangur masën administrative.  Gjatë këtij viti, Policia Rrugore e Tiranës ka goditur 10 raste të mitëdhënies. Në vijim të goditjeve të njëpasnjëshme të tentativës për mitëdhënie dhe si rezultat i kontrolleve permanente parandaluese për evidentimin dhe ndëshkimin e atyre drejtuesve të automjeteve që shkelin rregullat e qarkullimit rrugor, në rrugën “Imer Ndregjoni”, efektivët e Komisariatit Rajonal të Policisë Rrugore Tiranë kanë konstatuar një drejtues mjeti që po përdorte aparatin celular gjatë drejtimit të mjetit.

Gjatë kryerjes së veprimeve policore për shkeljen e konstatuar, drejtuesi i mjetit, shtetasi me iniciale A. S., 21 vjeç, i ka ofruar punonjësit të Policisë një kartëmonedhë me prerje 2000 lekë të rinj, me qëllim shmangien e ndëshkimit për shkeljen e kryer. Në përfundim të veprimeve u bë arrestimi në flagrancë i drejtuesit të mjetit, për veprën penale “Korrupsion aktiv ndaj personave që ushtrojnë funksione publike” dhe materialet i kaluan Prokurorisë së Rrethit Gjyqësor Tiranë, për veprime të mëtejshme.

TAG:
• Tirane
• policia e tiranes
• Afrim Sena