Thaçi e Daçiç, marrëveshje për të
përmbyllur procesin zgjedho

BRUKSEL - Takimi i ri sot në Bruksel, i 18-i mes kryeministrit serb, Ivica Daçiç dhe atij kosovar, Hashim Thaçi me ndërmjetësimin e shefes së diplomacisë europiane, Catherine Ashton ka përfunduar pasdite pas rreth dy orësh bisedime me një marrëveshje për t’i dhënë fund brenda një kohe të shkurtër procesit elektoral në Kosovë pas incidenteve të së dielës në zonat elektorale në veri të Kosovës, në Mitrovicë.

Do ketë përsëritje votimesh në tre zonat e Mitrovicës, të dhunuara nga sulmet e ekstremistëve serbë, të cilët kanë keqtrajtuar të pranishmit dhe kanë shkatërruar materialet elektorale dhe procesin zgjedhor dhe do kërkohet përsëritje e zgjedhjeve përpara 1 dhjetorit, datë në të cilën janë fiksuar balotazhet e zgjedhjeve lokale. Kryeministri serb, Daçiç, i cili gjendej në krah të zëvendësit të tij, Aleksandar Vuçiç, e ka përkufizuar “një sukses” takimin e sotshëm, duke nënvizuar rëndësinë e tyre, edhe sepse përsëritja e votimeve do të mbledhë në votime numrin më të madh të mundshëm të serbëve të Mitrovicës.

''Nëse vendimi i komisionit elektoral për të anuluar dhe përsëritur votimin në tre zona në Mitorvicë do të konfirmohet dhe nëse serbët në veri të Mitrovicës nuk do të mblidhen të shumtë për të votuar, kryebashkiaku i tyre do të jetë një shqiptar'', ka paralajmëruar Daçiç, duke cituar mediat e Beogradit. “Kjo, ka shtuar, mund të krijojë konflikte ndoshta dhe të armatosura dhe në një rast të tillë Serbia s’mund të bëjë shumë. Ja përse - ka thënë - është ekstremisht e rëndësishme përsëritja e votimit, pasi në balotazhin e 1 dhjetorit do të shkojnë në zgjedhje më shumë serbë. Thaçi, nga ana e tij, ka theksuar se përsëritja e votimit do të mbahet brenda datës 1 dhjetor.

''Pas kësaj do kemi lider të rinj, të zgjedhur ligjshmërisht”, ka thënë kryeministri kosovar, i cili është shfaqur i kënaqur nga bisedimet me Daçiç dhe Ashton, në të cilat është folur edhe për zbatimin e marrëveshjes së prillit, në veçanti për tema si doganat, policia dhe drejtësia. ''Të dy palët janë impenjuar për t’i kryer ato në marrëveshje të plotë”.

Ashton nga ana e saj ka vlerësuar zgjedhjet e së dielës në Kosovë për pushtetin komunal si thelbësore për të ardhmen e Kosovës, ndërsa dënoi ashpër incidentet e dhunshme në veriun e Mitrovicës.

“Të gjithë votuesit kanë të drejtë pjesëmarrjeje në zgjedhje në një mjedis të sigurt dhe pa dhunë. Incidentet duhet të hetohen pa vonesë” thuhet në një deklaratë të zonjës Ashton.

Votimet në veriun e Mitrovicësu dëmtuan nga incidentet e së dielës mbrëma, kur persona të maskuar ndërhynë dhe shkatërruan kutitë e votimit në disa vendvotime në veri të Mitrovicës, duke detyruar largimin e komisionit të zgjedhjeve dhe të përfaqësuesve të Misionit të OSBE-së.

Redaksia Online
(sg/mag/shqiptarja.com)

TAG:
• OSBE