Tiranë, pensionistët shtypen
te sportelet e postës

Tiranë, pensionistët shtypen<br />te sportelet e postës
TIRANE- Të moshuarit vazhdojnë të zvarriten prej kohësh për të marrë pensionin e tyre. E njëjta situatë ka qenë edhe gjatë ditës së djeshme në pjesën më të madhe të njësive përkatëse të postës shqiptare. Ka pasur nga ata fatlumët që kanë mbaruar punë, por ka pasur edhe nga ata që duhet të kthehen të hënën. Reshit Hoxha dhe Aqif Ajdinolli janë vetëm dy nga pensionistët që ne takojmë përpara njësisë së postës me numër 322 që ndodhet në Unazë. Përpara tyre kanë shumë vetë në radhë, ndaj kanë shumë pak shpresa që të arrijnë të marrin gjë, pasi duke qenë se është e shtunë, posta do të qëndrojë hapur deri në orën 14:30. "Unë duhet ta kisha marrë pensionin që me datë 16 mars, - na sqaron Reshit Hoxha, - dhe kjo është hera e tretë që vij ta marr. Sot kam ardhur që në orën 09:00, por kishte shumë njerëz dhe deri tani nuk kam mundur të futem në radhë. Shpresoj që sot të mos kthehem duarbosh", - përfundon Reshiti, i cili falënderon zotin që jeta e tij nuk varet vetëm nga pensioni prej 13 mijë lekësh në muaj që ai merr. "Nuk e kuptoj pse duhet gjithë kjo rrëmujë. Dhe përse ne duhet ta marrim pensionin vetëm në një ditë të caktuar, po nëse jam në spital si t'ia bëj unë, të dal nga spitali dhe të vij të marr pensionin? Kjo është absurde dhe shteti duhet të gjejë një zgjidhje për ne, pasi është e turpshme të zvarritemi kështu për të marrë djersën e ballit", - na thotë pensionisti tjetër Aqif Ajdinolli. Ndërkohë një çift i moshuar, të cilët na thonë se janë edhe të sëmurë, na tregojnë se e kishin datën e pensionit më 10 mars, por e morën vetëm dje. "Kësaj here na dhanë edhe një faturë, me shumën e lekëve që tërhoqëm, është hera e parë që na e dhanë. Ne këto para i bëjmë ilaçe, ja tani direkt e në farmaci do të shkojmë", - na thotë çifti i të moshuarve, të cilët largohen të pakënaqur.
Një tjetër zonjë që është në radhë, është tejet e irrituar me këtë sistem që kanë zgjedhur për të shpërndarë pensionet. "Po kjo është absurde, - na thotë ajo. - të caktojnë një ditë kur të marrësh pensionin, dhe nëse nuk vjen atë ditë kushedi se kur të bie radha. Po unë gjatë muajve të verës nuk jetoj në Shqipëri, pse duhet të më caktohet vetëm një ditë mua? Pse nuk na e hedhin në bankë, siç bëjnë me rrogat dhe ta tërheq kur të dua. Ose po të mos dua, se tërheq fare? Turp t'u vijë që sillen me ne në këtë mënyrë! Shteti duhet të gjejë patjetër një zgjidhje", - na thotë ajo tejet e irrituar. Më pas ajo shpjegon se në fakt problemi nuk qëndron tek punonjësit e postës, por tek mungesat e parave apo ata që kanë hartuar këtë sistem. "Ne nuk kemi gjë me këta zonjat që punojnë këtu. Madje këta janë heroina, që dëgjojnë se çfarë nxjerrim ne nga goja. Por as ne s'e kemi me këta, por me shtetin. Këta të shkretat mbrëmë kanë punuar deri në orën 10:00 të darkës, kur nuk kishte më para dhe sot kanë ardhur prapë në punë, por edhe ne nuk kemi çfarë bëjmë dhe u zbrazemi këtyre", - na thotë më tej zonja që po pret të marrë pensionin, të cilin një ditë më parë nuk arriti ta merrte, megjithëse ka qëndruar deri natën vonë në radhë. Zyrtarisht posta shqiptare ka deklaruar se aktualisht po harton listat e reja, dhe kjo rrëmujë ka ardhur për shkak të informatizimit të listave të pensionistëve.

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

VIDEO/Mbledhja e këshillit bashkiak në Himarë, banori pështyn në fytyrë Vangjel Tavon

VIDEO/Mbledhja e këshillit bashkiak në Himarë, banori pështyn në fytyrë Vangjel Tavon