Tirana është sot nën masa të forta sigurie për ndeshjen Shqipëri-Serbi, që luhet në orën 20:45 në stadiumin “Arena Kombëtare”. Mbi dy mijë efektivë të Policisë së Shtetit, përfshirë RENEA, FNSH, Antiterrori dhe SHISH janë angazhuar për mbarëvajtjen e ngjarjes.
 
Masat e sigurisë u morën që nga Rinasi një ditë më parë me mbërritjen e ekipit serb.

Zona përreth stadiumit do “blindohet” dhe qarkullimi i automjeteve do të kufizohet që prej orës 15:00 në bulevardin “Dëshmorët e Kombit”, rruga George W. Bush, rruga e Elbasanit dhe rrugët hyrëse drejt stadiumit. Qarkullimi do jetë i kufizuar deri në përfundim të ndeshjes dhe shpërndarjes së tifozëve.

Tifozët duhet të paraqitën në hyrje që në orën 18:00 dhe do t’i nënshtrohen kontrolleve të imtësishme. Ata do t’i nënshtrohen kontrolleve të detajuara dhe nuk do të lejohen të futen sende të ndaluara si flakadanë, fishekzjarre apo banderola me përmbajtje fyese apo raciste.

Tifozë serbë nuk do të ketë për shkak të dënimit të dhënë nga UEFA.

Policia ka paralajmëruar ndëshkime penale për çdo akt dhune, përfshirë hyrjen në fushë apo goditjen e sportistëve. Gjithashtu çdo dron që tentohet të ngrihet në zonën e sigurisë do të neutralizohet menjëherë përmes pajisjeve anti-dron.

Akset rrugore që preken:
Bulevardi “Dëshmorët e Kombit”, nga kryqëzimi pranë Presidencës drejt sheshit “Nënë Tereza”,
rruga “Papa Gjon Pali i II”,
rruga “Dervish Hima”, pranë Ambasadës së SHBA-së,
rruga “Asim Zeneli”, pranë Ambasadës së SHBA-së,
rruga “Themistokli Gërmenji”,
rruga “Gjergj Filipi”,
rruga “Lekë Dukagjini”, pranë ish-Gardës së Republikës deri tek stadiumi,
rruga “Faik Konica”
rruga “Skerdilajd Llagami”.
Parkimi i autobusëve me tifozë vendas që vijnë nga Korça dhe Elbasani, do të bëhet në parkingun e lokal “Kalvin”, ndërsa autoveturat te terminali pranë qytetit “Studenti”.
Parkimi i autobusëve që vijnë nga veriu dhe jugu, do të bëhet në parkimin “Terminali i përpunimit të automjeteve” pranë mbikalimit të Kamzës, ndërsa autoveturat tek parkingu pranë pallatit të sportit “Asllan Rusi”, në parkingun nëntokësor në sheshin “Skënderbej”, si dhe në parkingun nëntokësor në “Bulevardin e Ri”, te ish-stacioni i trenit.
Rruga nga hoteli ku është akomoduar ekipi i futbollit të Serbisë  që ndodhet në bulevardin “Gjergj Fishta”,  deri në drejtim të stadiumit “Arena Kombëtare”, përmes bulevardit “Bajram Curri”, pasditen e sotme në orën 16:30 dhe ditën e  nesërme në orën 18:45, do ketë kufizime të pjesëshme deri ne 25 minuta në momentin që do eskortohet ekipi për në stadium për stërvitje mbasditen e sotme dhe nesër për të zhvilluar ndeshjen.