Në deklaratën e ministrisë së Jashtmë thekoshet se ky është një hap i rëndësishëm dhe një garanci në përballimin e sfidave që e presin në përmbushjen e aspiratave strategjike, për ecurinë e Kosovës dhe të rajonit tonë drejt integrimit të plotë euro-atlantik. Tirana zyrtare beson se edhe procesi i administrimit të zgjedhjeve do të përmbyllet me sukses.
Më poshtë deklarata e plotë e Ministrisë së Jashtme:
Ministria e Punëve të Jashtme e Republikës së Shqipërisë përshëndet organizimin, zhvillimin dhe administrimin e zgjedhjeve parlamentare të 8 qershorit 2014, në të gjithë territorin e Republikës së Kosovës.
MPJ përgëzon faktin se për herë të parë i gjithë populli i Kosovës mori pjesë në votime dhe se karakteri gjithëpërfshirës i këtyre zgjedhjeve ishte i rëndësishëm për zhvillimin e demokracisë e të ardhmen e vendit, dhe vendimtar për të ardhmen euro-atlantike të Kosovës.
MPJ vlerëson pjekurinë e dëshmuar në këtë proces zgjedhor nga qytetarët dhe elita politike e Kosovës dhe shpreh besimin se edhe procesi i administrimit të zgjedhjeve do të përmbyllet me sukses.
Ministria e Punëve të Jashtme shpreh bindjen se ky hap i rëndësishëm e shton suksesin e shënuar prej Kosovës dhe përbën një garanci në përballimin e sfidave që e presin në përmbushjen e aspiratave strategjike, për ecurinë e Kosovës dhe të rajonit tonë drejt integrimit të plotë euro-atlantik dhe stabilitetit të qëndrueshëm.
Redaksia Online
(g.f/shqiptarja.com)
![](https://www.shqiptarja.com/template/img/sh_logo1.png)