Tiranë/ E mitura largohet pa leje nga shkolla tek Fresku, vë në alarm familjen! Gjendet në Laprakë tek shtëpia e gjyshërve

Tiranë-Një nxënëse 10 vjeçare është larguar sot nga një shkollë në Fresk pa dijeninë e askujt. 

Pas marrjes së njoftimit rreth orës 14:50 uniformat blu nisën kërkimet dhe nga këqyrja e kamerave të sigurisë të bizneseve përreth shkollës e më tej, arritën të lokalizonin vendodhjen e të miturës.

Fatmirësisht vajza kishte shkuar në shtëpinë e gjyshërve në zonën e Laprakës.

"Ditën e sotme, rreth orës 14:50, është marrë njoftim se një nxënëse 10 vjeçe, që frekuenton një shkollë në zonën e Freskut, është larguar nga ambientet e shkollës pa dijeninë e prindërve dhe stafit të shkollës dhe nuk dihej vendndodhja e saj.

Shërbimet e Komisariatit të Policisë Nr. 4 pas marrjes së njoftimit janë angazhuar maksimalisht për gjetjen e saj me anë të shërbimeve të terrenit dhe duke këqyrur kamerat e sigurisë të bizneseve përreth shkollës.

Pas kryerjes së verifikimeve në terren është bërë lokalizimi i 10-vjeçares, e cila është gjetur në banesën e gjyshërve të saj, në zonën e Laprakës", njoftoi sot policia.

E mitura është intervistuar në prani në prindërve dhe psikologëve dhe gjatë intervistimit ka deklaruar se është larguar nga shkolla me dëshirë.

Xh.K/Shqiptarja.com

TAG:
• shkollë
• nxenes
• laprake
• Tirane