Tiranë/ Ishte duke punuar, bie nga lartësia e pallatit 50-vjeçari, ndërron jetë në vend

TIRANË- Një ngjarje e rëndë është regjistruar pasditen e kësaj të marte, ku një 50-vjeçar, ka rënë nga kati i 7-të i një pallati në zonën e Astirit, e për pasojë ka ndërruar jetë në vend. Viktima është identifikuar si Krenar Aliu, i cili ka qenë duke punuar në momentin që ka rënë nga pallati.

"Më datë 10.05.2022, rreth orës 16:55, në rrugën "Kasem Shima", dyshohet se aksidentalisht ka rënë nga kati i gjashtë i një banese ku ishte duke punuar, shtetasi K. A., 50 vjeç, i cili si pasojë ka ndërruar jetë.  Grupi hetimor ndodhet në vendngjarje dhe po punon për sqarimin e rrethanave të ngjarjes", thuhet në njoftim.

Report Tv sjell foto nga vendi i ngjarjes, ku në katin e 7-të hyrjes së pallatit duken ende kova në dritare dhe shkalla në ambientet e brendshme. Për fat të keq, siç mund të shikohet në pamje, mund të vihet re mungesa e kushteve të punës.

Foto nga vendi i ngjarjes

Ndërtimi është një ndër sektorët më problematik ku punonjësit punojnë pa masa mbrojtëse, duke vënë në rrezik jetën e tyre, teksa janë regjistruar jo pak ngjarje fatale, ku kanë humbur jetën në ambientet e punës. Rasti më i fundit ka qenë në qytetin e Durrësit, ku 53-vjeçari Genci Spaho ishte punonjës ndërtimi në objektet që po ndërtohen ne lagjen 15 për familjet e prekura nga tërmeti i 26 nëntorit.

Report Tv e ka trajtuar jo pak herë këtë problematikë, ku referuar shifrave gjatë vitit të shkuar si pasojë e aksidenteve në punë kanë humbur jetën 25 persona. Pjesa më e madhe e fataliteteve janë në disa sektor që nivelin e rriskut e kanë më të lartë, mes tyre ndërtimi, minierat, apo sektori i energjisë.

B.K./Shqiptarja.com

TAG:
• Tirane
• Krenar Aliu
• aksident ne pune