TIRANË - Një 53-vjeçar është arrestuar doitën e sotme nga policia, pasi gjatë protestës së dhunshme të thirrur nga Rithemelimi dhe Partia e Lirisë përpara Bashkisë Tiranë, ai ka kundërshtuar dhe ka ushtruar dhunë ndaj punonjësve të Policisë.

Arrestimi i 53-vjeçarit të identifikuar si Artan Muçmata vjen si rrjedhojë e hetimeve që po kryehen nga policia e shtetit në lidhje dhunën e ushtruar nga protestuesit të thirrur nga Rithemelimi dhe Partia e Lirisë, në protestën para Bashkisë Tiranë, më 19 prill 2024.

“Në vijim të veprimeve hetimore të kryera në lidhje me aktet e dhunshme gjatë protestës së datës 19.04.2024, përpara Bashkisë Tiranë, u ndalua shtetasi A. M., 53 vjeç, banues në Tiranë.

Gjatë protestës, 53-vjeçari ka kundërshtuar dhe ka ushtruar dhunë ndaj punonjësve të Policisë”,-njofton policia.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë.

Rendit zhvillimet sipas orarit:
Ora 20:13
‘I infiltruari në protestën para bashkisë i dënuar në Itali’, Policia nxjerr ‘blof’ Rithemelimin: Gënjeshtër, kur ndodhi ngjarja ishte 8 vjeç

1713723296_bashkiatirane.jpg

Akuzat e Rithemelimit se polici Ervin Zela që ndodhej në protestën para bashkisë së Tiranës është dënuar me 12 vite burg për vrasje në Itali janë rrëzuar nga Policia e Shtetit. Sipas policisë lajmi i publikuar në disa medie nuk është i vërtetë, pasi efektivi është i datëlindjes 2000 dhe kur ka ndodhur ngjarja për të cilët e akuzon Rithemelimi, Zela ka qenë vetëm 8 vjeç.

Reagim i Policisë së Shtetit:

Në lidhje me një lajm të publikuar në disa portale për një punonjës Policie, sqarojmë opinionin publik se pas verifikimeve të kryera, lajmi i publikuar është i pavërtetë. Shtetasi E. F. Z., i datëlindjes  07.11.2000, është bërë pjesë e strukturave të Policisë së Shtetit në janar të vitit 2022, pasi ka mbaruar kursin për Patrullë të Përgjithshme, në Kolegjin e Policisë, pranë Akademisë së Sigurisë.

Shkrimi i publikuar në mediat italiane i referohet ngjarjes së ndodhur në vitin 2008, dhe në atë kohë punonjësi i Policisë, shtetasi E. F. Z., ka qenë 8 vjeç. Publikime të tilla dashakeqe dhe të pavërteta, cenojnë imazhin e punonjësit të Policisë dhe të Organizatës së Policisë.

B.K/Shqiptarja.com