Një ngjarje e rëndë është shënuar në kryeqytet, ku një person ka terrorizuar shitësin e një dyqani me sëpatë. Siç shihet në video, personi është futur në dyqan me sëpatë në dorë dhe ka shkatërruar gjithçka që kishte brenda, ndërsa policia raporton se autori ka shkatërruar tre biznese private, që ndodheshin ngjitur me njëri-tjetrin.

Shqiptarja.com dhe Report Tv mësuan se kjo është një ngjarje e përsëritur, pasi ky person ka shkatërruar dhe herë të tjera ambiente të ndryshe. Burime i thanë Report Tv se autori kishte shkatërruar po me sëpatë edhe një ‘Lloto Sport’, si dhe makina në rrugë.

Dhunuesi është vënë në prangat e policisë, por nuk dihet sa do të qëndrojë në qeli, pasi uniformat blu njoftojnë se ai është me probleme mendore. Po ashtu, bëhet e ditur se ky person nuk është i rrezikshëm për njerëzit, pasi objektiv i tij duket të jetë vetëm pajisjet në dyqane të ndryshme apo makinat.

Videoja e fundit, ku autori shfaqet në një dyqan me sëpatë në dorë, duke shkatërruar kompjuterët dhe tavolinat, është publikuar nga Olti Curri në ‘Facebook’, ku pamjet tregojnë qartë se objektiv i autorit nuk është shitësi, të cilin e nxjerr jashtë dhe më pas fillon të shkatërrojë zyrën.

Njoftimi i Policisë së Tiranës:
Në lidhje me një video të publikuar në rrjetet sociale ku një shtetas shkatërron me sëpatë ambientet e një biznesi, ju informojmë se: Ngjarja ka ndodhur më datë 27.11.2017, në Laprakë, Rruga "Lord Bajron". Me të marrë njoftim menjëherë në vendngjarje kanë shkuar Efektivet e Policisë të Komisariatit nr.3, të cilët kanë konstatuar se një shtetas me sëpatë ka shkatërruar ambientet e brendshme të tre bizneseve private, të cilët ndodhen ngjitur me njëri-tjetrin. Grupi hetimor ka bërë të mundur identifikimin dhe kapjen a autorit, shtetasin F.Sh. 34 vjeç, banues në Tiranë.

Veprimet procedurale nga ana e uniformave blu janë kryer në bashkëpunim me Prokurorinë e Rrethit Gjyqësor Tiranë ku shtetasi i mësipërm u arrestua në flagrancë për veprën penale" Shkatërrimi i pronës" parashikuar në nenin 154 të Kodit Penal. Ju informojmë se njoftimi në lidhje me ngjarjen e mësipërme është raportuar nga Policia e Tiranës si edhe në faqen zyrtare të Policisë së Shtetit në internet.

d.c./shqiptarja.com