Tiranë/ Tritol automjetit të 36-vjeçarit, e porositi vrasësi me pagesë nga burgu i Fushë-Krujës! Shkak prishja e pazareve të drogës, 7 në pranga (EMRAT + VIDEO)

Në shtator të vitit 2025, Sabah Nuzi u mbyll në qeli me një akuzë të rëndë mbi shpinë, atë të vrasësit me pagesë. 50 mijë euro e akuzon SPAK, se mori 33-vjeçari për të vrarë dhe groposur Klevis Lleshin në vitin 2020, një bashkëpatriot nga Burreli, vetëm 22 vjeç. Ishte erozioni që nxori në sipërfaqe eshtrat e të riut, duke çuar hetuesit e Posaçëm në gjurmët e ekzekutorit dhe porositësit, me lëshimin e 4 urdhër arresteve në shtator të 2025-ës.

Prej atëherë Sabah Nuzi është në paraburgim në Fushë-Krujë për një sërë veprash të rënda penale, vrasje për gjakmarrje, armë pa leje, fshehje e kufomës dhe grup i strukturuar kriminal.

Megjithatë, hekurat e qelisë nuk e penguan Sabah Nuzin të ruajë lidhjet me anëtarët të organizatës kriminale dhe të rëndojë edhe më shumë pozitën e tij penale. Është Policia e Tiranës që e akuzon 33-vjeçarin se ka porositur shpërthimin me tritol në një makinë në kryeqytet, ngjarje e ndodhur në orët e para të mëngjesit të 10 marsit.

Sipas bluve të Tiranës, shpërthimi me tritol, i cili la pas vetëm dëme materiale është realizuar nga anëtarët e një grupi kriminal, me porosinë e ardhur nga burgu i Fushë-Krujës, nga Sabah Nuzi.

Burime nga policia thonë se e gjitha ka nisur për borxhe që burojnë nga prishja e pazareve të drogës. Sabah Nuzi pretendonte se Oltjon Klosi nuk i kishte shlyer 15 mijë euro të marra në Spanjë dhe pasi borxhi u refuzua, nga qelia doli urdhri për t’i vënë tritol. Shtatë të dyshuar u arrestuan.

Sipas policisë, tritoli në makinë është vendosur nga Jurgen Gjonaj, 32 vjeç. Tre të tjerë nga grupi, Renato Balla, 25 vjec, Kristjan Ahmerama 24 vjec dhe Eklips Leti, 27 vjeç e kanë ndihmuar duke i siguruar tritolin, fotot edhe vendndodhjen e automjetit, biçikletën me të cilën do lëvizte, si dhe një banesë se ku të strehohej pasi të realizohej shpërthimi. Ata akuzohen për shkatërrim të pronës me eksploziv e kryer në bashkëpunim.

Ndërkohë tre anëtarë të tjerë, Glentjan Kojtari, 29 vjec, Dorjan Hamolli 34 vjec dhe Geris Molla, më i vogli i grupit, 19-vjeçar, e kanë transportuar me makinë autorin e vendosjes së tritolit, Jurgen Gjonaj. Ata akuzohen për përkrahje të autorit të krimit

Vrasja dhe groposja e Klevis Lleshit, ngjarje për të cilën Sabah Nuzi ndodhet në qeli si ekzekutor, dyshohet se u porosit nga Aurel Hoxha si hakmarrje për vrasjen e vëllait të tij në Londër, nga Arben Lleshi, edhe ky i vrarë në burgun e Peqinit, krim i marrë përsipër nga një i dënuar.

Grupi kriminal të cilit hetuesit e posaçëm i vënë në krye Aurel Hoxhën, akuzohet edhe për pastrim të parave të drogës përmes investimeve të dyshimta në Shqipëri dhe jashtë saj.

 

K.B/I.M/Shqiptarja.com

TAG:
• Sabah Nuzi
• Geris Molla
• Dorjan Hamolli
• Glentjan Kojtari
• Eklips Leti
• Kristjan Ahmerama
• renato balla
• Jurgen Gjonaj
• oltjon klosi
• Tirane