Topalli me ekspertët e ODIHR
“Rekomandimet, reforma jonë”

TIRANË – Takimin e parë pas mbërritjes në Tiranë, ekspertët e OSBE/ODIHR e kanë patur me kryetaren e Kuvendit, Jozefina Topalli.
“53 rekomandimet e ODIHR-it janë reforma jonë zgjedhore”, tha Topalli pas takimit me ekspertët Jessie Pilgrim dhe Richard Lappin. Ata janë në Shqipëri për t’i dhënë asistencë teknike Komisionit të Posaçëm Parlamentar për Reformën Zgjedhore.
Duke falenderuar përfaqësuesit e ODIHR-it për kontributin dhe mbështetjen dhënë Shqipërisë për reformën elektorale, Kryetarja e Kuvendit vlerësoi përfundimet e Raportit e ODIHR, që i cilësoi zgjedhjet e fundit “kompetitive dhe transparente”
“Këto zgjedhje, - tha Kryetarja e Kuvendit - ishin më transparentet dhe u zhvilluan me një sistem demokratik zgjedhor të propozuar nga PS e të miratuar me konsensus të plotë nga socialistët e demokratët në Parlament”
Po ashtu, sipas saj opinioni i përbashkët i ODIHR-it dhe Komisionit të Venecias përbën një dokument ligjor profesional i cili shërben si plan pune në zbatimin e 53 rekomandimeve për zgjedhjet, të cilat janë çështje standardi dhe jo çështje partiake.
Sipas njoftimit të zyrës së shtypit të Kuvendit, Pilgrim, një njohës i mirë i çështjeve zgjedhore dhe i proceseve elektorale në vendin tonë tha se “Shqipëria ka një progres shumë evident përsa i përket kuadrit ligjor dhe rritjes së standardeve zgjedhore.”
Sipas Kuvendit, ekspertët e ODIHR thanë se “jemi maksimalisht të gatshëm për të asistuar në reformën zgjedhore në mënyrë që ajo të përfundojë në kohën e duhur.” Ata shprehën bindjen në cilësinë e lartë të ekspertizës shqiptare.
(aq/shqiptarja.com)

TAG:
• OSBE