Topi dekoron publicistin
Ardian Klosi pas vdekjes

TIRANE-  Vetëm një ditë përpara se të dorëzojë postin tek Presidenti i Zgjedhur Bujar Nishani kreu i shtetit në detyrë, Bamir Topi firmosi dekretin e fundit për të dekoruar publicistin, përkthyesin dhe veprimtarin e shquar Ardian Klosi, që u nda nga jeta muaj më parë. Dekorimi i tij do të bëhet pas vdekjes për “Merita të larta në fushën e gjuhësisë, publicistikës, përkthimit dhe veprimtarisë së shoqërisë civile”.

Presidenti i Republikës, Bamir Topi i akordoi Ardian Klosit (Pas vdekjes) urdhrin “Mjeshtër i Madh” me motivacionin: “Intelektualit të shquar antikonformist që ia kushtoi gjithë veprimtarinë e tij si publicist, studiues, veprimtar shoqëror, krijues e përkthyes çështjes së demokracisë në vend duke e konsideruar atë si rrugën drejt drejtësisë shoqërore, së vërtetës, moralit e progresit, ndaj dhe refuzoi deri në fund të jetës kompromisin me atë lloj politike që i bie ndesh këtij qëllimi”.

Familjarë, miq, elita intelektuale dhe përfaqësues të shoqërisë civile, më të cilët Klosi ka ndarë për vite me radhë të gjitha gëzimet e shqetësimet e tij ndodhen në Presidencë për të marrë pjesë në këtë ceremoni. Në ceremoni ndodhet dhe kreu i PS-së Edi Rama.

Përkthyesi, publicisti, njeriu i letrave ndërroi jetë më datën 26 prill duke i dhënë fund jetës së tij me vetëvarje. 

(sg/shqiptarja.com)