TIRANE-Para pak ditësh u arrestuan 39 nga 51 persona të përfshirë në falsifikimin e dokumenteve dhe pasaportave, që kishin arritur të dërgonin në SHBA, Kanada dhe Angli mbi një mijë shqiptarë. REPORT TV sjell pamjet e apartamentit në zonën e Kodrës së Diellit në Tiranë që ishte kthyer në bazë të trafikantëve. Eno Muçollari së bashku me gruan Lirie Muçollari kishin marrë një apartament me qira në këtë zonë duke e kthyer në bazë të falsifikimit të dokumenteve.
Materialet për falsifikimin e dokumenteve i siguronte Liri Muçollari, bashkëshortja e Eno Muçollarit. Report TV ka siguruar vendimin e plotë të Gjykatës së Krimeve të Rënda, ku thuhet se “Liri Muçolari ka shkuar në 16 janar të 2018-së në Itali, ka qëndruar 4 ditë dhe kur është rikthyer i janë gjetur në bagazhe letra ngjitëse dhe karta plastike aq sa madhësia e kartave të identitetit”.
“Eno Muçollari, banues te kodra E Diellit, është personi që disponon laboratorin për falsifikimin e dokumenteve, sipas porosive dhe aktivitetin e kryente në bashkëpunim me bashkëshorten”, thuhet në dosje.
Fuat Zaimi ishte personi që luante rolin e ndërmjetësit midis Eno Muçolarit dhe personave që dëshironin të kinin në SHBA dhe Kanada. Nikolin Priska shpërndante dokumentet e falsifikuara, ndërsa Haki Tarja dhe Bashkim Sorra ishin ndërmjetës. Ylber Rama porosiste dokumentet e falsifikuara.
Këta 7 persona ishin edhe krerët e këtyre grupeve kriminale që bënin falsifikimin e identiteteve dhe më pas dërgimin ilegal në SHBA, Kanada dhe Britani të shqiptarëve. Ndërkohë Luan Qyrku ishte organizator i emigrimit të paligjshëm, Genci Osmanaj transportues dhe përkthyes, Arben Kajaçi bënte transportin e shqiptarëve drejt Bullgarisë dhe më pas drejt Amerikës Latine.
Tanush Prengda dhe Përparim Kuke bënin akomodimin e emigrantëve të paligjshëm. Skënder Koçi dhe Shkëlqim Koçi drejtojnë një rrjet për emigrimin e paligjshëm të klandestinëve nga Republika Domenikane drejt SHBA-së dhe Kanadasë. Dy bullgarët Borislav Krumov dhe Marin Vasilev bënin falsifikimin e dokumenteve në Bullgari dhe dërgimin e emigrantëve në SHBA nga Republika Domenikane.
39 persona kanë rënë në pranga si pjesë e këtyre grupeve kriminale, ndërkohë që 12 të tjerë janë shpallur në kërkim. 39 të arrestuarit u lanë të gjithë në burg nga Gjykata e Krimeve të Rënda, mes tyre edhe 4 policë, ndërsa një tjetër oficer policie është ndaluar për dekonspirim të operacionit.
Këto grupe kriminale merrnin 7 mijë paund për dërgimin e emigrantëve të paligjshëm në Britaninë e Madhe si dhe 25-30 mijë dollar për trafikimin e emigrantëve shqiptarë drejt SHBA-së dhe Kanadasë.
Report TV disponon edhe emrat e 11 shqiptarëve që kanë emigruar në mënyrë të paligjshme drejt SHBA-së dhe Kanadasë, por për shkak të sekretit hetimor vendos të mos i publikojë.
Dosja e prokurorise per banden e trafikut te klandestineve ne SHBA
d.b/shqiptarja.com
