TIRANE-Policia e Shtetit ka ndalur një efektiv policie, i cili dyshohet se ka dekonspiruar operacionin për goditjen e 7 grupeve kriminale që dërguan mbi një mijë shqiptarë në SHBA, Kanada dhe Angli përmes shumave nga 7 mijë paund, deri te 30 mijë dollarë. Polici i ndaluar është Adriatik Bakiasi dhe nga burimet për Report Tv nga policia pohohet se dekonspiroi operacionin e falsifikuesve të dokumenteve.

Operacioni u finalizua para dy ditësh dhe nga 51 persona të përfshirë, 39 u arrestuan në Shqipëri, mes tyre 4 policë, ndërsa për 12 të tjerët (2 bullgarë) po punohet për prangosjen. Katër policët e arrestuar para dy ditësh ishin me detyrë kontrollorë në Pikat e Kalimit Kufitar, Hani i Hotit dhe Qafë Thanë, të cilët kanë shpërdoruar detyrën duke mos kryer regjistrimin e shtetasve të kontrabanduar.

Ndërsa ende nuk dihet se cili ka qenë pozicioni i Adriatik Bakiasit, i cili eshte polici i peste i perfshire ne kete ngjarje dhe qe u ndalua mbrëmjen e djeshme për dekonspirim të operacionit. Report Tv zbuloi se 39 personat e arrestuar bënin falsifikimin e dokumenteve për emigrantët e paligjshëm që kanë dërguar në Britani, SHBA dhe Kanada, sikur këta të fundit ishin shtetas europian, bullgar apo të tjerë.

Rreth 200 persona janë dërguar drejt Britanisë ndërsa 800 të tjerë në SHBA dhe Kanada. Këto 7 grupe kriminale kanë përfituar rreth 25 milionë dollarë nga trafikimi i emigrantëve. Kjo për faktin se rreth 200 shqiptare janë dërguar në Britani, ndërsa 800 të tjerë në SHBA dhe Kanada. Burime policore thanë se një pjesë e dokumenteve falsifikoheshin në Shqipëri, ndërsa pjesa tjetër jashtë vendit tonë.

d.b/shqiptarja.com