SHKODER- Prokuroria e Shkodrës po verifikon të gjitha kamerat e sigurisë të bizneseve e lokavele buzë lumit Buna për të zbardhur dhe itenerarin e rrugëtimit të fundit të Alma Arrazit, gruas 39 vjeçare e cila u vetëmbyt me tre fëmijët në lumin Buna. Ngjarja e rëndë u shënua më 2 maj 2024.

Shqiptarja.com  dhe Report Tv siguroi pamjet që më pas do të jenë momentet e fundit për Almën  me 3 fëmijët e saj të mitur.

Njëra është momenti kur Alma me tre fëmijët ndahet nga kunata me fëmijën e saj dalin nga lokali ku kishin konsumuar një kafe tek Hyrja e Parkut të Biçikletave. Duhet të jetë ora  20:10. Pasi përshëndeten me njëra-tjetrën,  Alma merr të largohet ndërsa ka përdore djalin e vogël, Arditin 3 vjeç dhe njërën prej vajzave, Gresin 7 vjeçe dhe Ergesën 9 vjeçe. Kunata e me vajzën e vogël ikin në drejtimin e kundërt. Por si fillim ndalon për pak dhe i shkruan dikujt në telefon.

Ndoshta kunata ka njoftuar në familje se Alma nuk po kthehej në shtëpi, siç më tej ka dëshmuar edhe në prokurori, se 39-vjeçarja i kishte rrëfyer që donte të merrte kohë të qetësohej duke shkuar tek familja e saj dhe se vëllai do vinte ta merrte me taksi për tu nisur drejt Durrësit.

Në një sekuencë tjetër rreth orës 20:21 Alma Arrazi shfaqet në trotuar së bashku me fëmijët e saj, tek ura e re e Bunës, vetëm pak minuta përpara se Alma Arrazi të hidhej së bashku me 3 fëmijët në lumin Buna, aty ku dhe gjetën vdekjen. Në video shihen lëvizje të njerëzve dhe automjeteve.

Ngjarja tragjike u zbulua kur u gjet rastësisht nga një peshkatar trupi i vajzës së parë, ndërsa trupat e tjerë u gjetën pas 3 ditë kërkimesh nga polumbarët. Tragjedia e familjes Arrazi dyshohet se është pasojë e dhunës psikologjike dhe tradhtisë bashkëshorte siç familjarë të saj kanë dëshmuar ekskluzivisht edhe për Report Tv.

Motra dhe babai i saj, Genta dhe Azem Bushati treguan se Erdgys Arrazi, i cili ndodhet në qeli si personi i dyshuar që shtyu gruan drejt vetëvrasjes, e tradhtonte dhe denigronte si grua. Trupat e fëmijëve dhe nënës u gjetën nga data 4 maj deri më 7 maj, gjatë kërkimeve në rrjedhën e lumit Buna. Me kërkesë të familjarëve, Alma u varros në Durrës pranë nënës së saj, ndërsa fëmijët prehen në Shkodër.

Foto: Alma Arrazi ndahet me kunaten pasi kanë dale nga lokali, 2 maj 2024