Tre grupe terroristësh në sulmet
në Paris, atentatorët me dy makina

Tre celula terroristësh janë përfshirë në ngjarjen e së premtes në Paris ku mbetën të vrarë 129 persona dhe mbi 350 të plagosur.

"Ne tashmë kemi për detyrë të gjejmë nga ata vijnë dhe kush i ka organizuar", - tha prokurori i Përgjithshëm francez Francois Molins.

Në një deklaratë për mediat ai tha se 7 terroristë kanë mbetur të vdekur nga sulmi pasi ishin të armatosur me brez eksplozivi.

Molins tha gjithashtu se tre persona janë arrestuar nga autoritetet belge gjatë kësaj të shtune ndërkohë që kryeministri belg konfirmoi më parë se një prej të dyshuarve nga Belgjika ka qenë në Paris të premten megjithëse ende nuk konfirmohet si autor. 
 
Një nga terroristët ishte francez
 Gjatë komunikimit me median mbrëmjen e së shtunës, prokurori Molins konfirmoi se një prej terroristëve të vrarë ishte identifikuar si një 30 vjeçar francez i cili nuk është i panjohur për autoritetet pasi kishte një sërë rekordesh kriminale, por i padënuar ndonjëherë. Ai vinte nga lagjja "Courcouronnes", 25km në perëndim të Parisit.
 
Molins tha se policia po heton dhe ka identifikuar 2 makina si pjesë e sulmit, një Seat të zi dhe një Volsvagen Polo po në ngjyrë të zezë të përdorur nga terroristët.

Ai tha se mjeti Volsvagen ishte marrë me qira nga një shtetas francez që jetonte në Belgjikë. Ky person ishte identifikuar në një pikë kontrolli policor mëngjesin e së premtes ku së bashku me një tjetër po tentonin të kalonin në Belgjikë. Grupi hetimor po punon në këtë pistë, ndërkohë sipas BBC mendohet se ekziston një grup i katërt terroristësh ku këta tre persona mendohet të jenë pjesë.

Prokurori i Përgjithshëm tha gjithashtu se është identifikuar edhe një emigrant sirian i cili kishte hyrë në Greqi i rregjistruar si emigrant përmes ishullit të Lesbosit

Redaksia Online
(S.M/Shqiptarja.com)