Tregtia e armëve, MM: PS merr
dokumente në mënyrë anti-ligjore

TIRANE - Ministria e Mbrojtjes ka reaguar sot e shqetësuar jo për akuzat e deputetit të PS, Erion Braçe dhe për të dhënë një shpjegim në lidhje me to, por për faktin se si Partia Socialiste i disponon këto dokumente, sipas zëdhënëses Lorisa Ylli, në rrugë anti-ligjore.

“Meqë kërkon respektimin e ligjit, bëhu pjesë e luftës për vendosjen e ligjit, dhe jo bashkëpunëtor në veprimtari antiligjore. Bazuar në ligj, kontratat e shitblerjes së armëve janë të klasifikuara. Ju sot, ishit në dhunim të plotë të ligjit. Ju zoti Braçe e dini fare mirë se çfarë janë plehrat e komunizmit. Dhe po ju deklarojmë se Ministria e Mbrojtjes është e vendosur deri në fund për ti pastruar ato.”- theksoi në një komunikim për mediat zëdhënësja Lorisa Ylli.

Sipas Ministrisë së Mbrojtjes, shitja e armëve dhe municioneve, për aq sa lejon ligji, është i deklaruar, publik dhe i monitoruar nga OKB, BE dhe OSBE dhe Shqipëria ka një rekord të pastër në këtë veprimtari, ndërsa akuzat e PS për tregtinë e armëve sipas ministrisë ka çuar në uljen e të ardhurave me 50 % për vitin që shkoi.

Sipas Ministrisë së Mbrojtjes, Braçe me këto deklarata po nxit shthurjen institucionale, e cila nuk është në interes të shoqërisë shqiptare.

“Ju sot morët në mbrojtje shkelësit e ligjit, kur në fakt duhet të bëni të kundërtën.” – përfundon deklaratën e saj kundër Braçes Ministria e Mbrojtjes, nëpërmjet zëdhënëses të saj, LorisaYlli.

(jd/Shqiptarja.com)

TAG:
• OSBE