Tregu i kafshëve të gjalla në Milot, përkeqësohet çdo ditë. Qindra kafshë tregtohen çdo të diel në Milot, treg që funksionon si i tillë që prej vitit 1920, ndërkohë që situata është e njëjtë si para një shekulli. Kafshët janë të pamatrikuluara, veterineri i bashkisë nuk ekziston. Mes baltës, pluhurit e qindra kafshëve pa origjinë e certifikata veterinare, Tregu i Milotit shndërrohet të dielave edhe në një thertore. Në gjithë këtë situatë mospërfilljeje mes institucioneve vendore dhe qendrore, konsumatorët shqiptare janë në rrezik.
Ndërkohë që Bashkia e Kurbinit, nuk ka marrë asnjë masë për të përmirësuar kushtet, as për të lënë veterinerin zyrtar që të zbatojë ligjin. Ndërkohë që Drejtoria e Bujqësisë në Lezhë, që e ka në varësi, është e pafuqishme të ndërhyjë. Në këto kushte, ky treg është i shndërruar në një “krater vullkani” për përhapjen e sëmundjeve, nga ferma në fermë dhe më e rëndësishmja, nga kafshët te njeriu. Ndërkohë që dhjetra kafshë theren dhe konsumatorëve iu serviret mish i pasigurt.
Ekspertët e tregjeve të kafshëve të gjalla dhe te veterinarisë, Edi Fero dhe Agim Rrapaj lëshojnë alarmin, duke thënë se, “një treg i tillë nuk duhet dhe nuk mund të funksionojë në këto kushte, pasi shndërrohet në vrastar i njerëzve”. Sipas tyre, pushteti vendor e ka për detyrë plotësimin e kushteve, ndërkohë që nuk përfill as urdhrin e kryeministrit Rama të vitit 2016, për ndryshimin e këtyre tregjeve.
