SHKODER - Kthimi i emigrantëve në kulmin e sezonit turistik ka rënduar trafikun në rrugët e Shkodrës.

Vështirësitë më të shumta janë në aksin rrugor Velipojë-Harku i Bërdicës, në hyrje të qytetit pranë urës së Bunës dhe rrugët e brendshme.

Ora 10 e paradites dhe 18 e pasdites konsiderohen si piku i trafikut që edhe më problematik bëhet në ditët e fundjavës.

Udhëtimi drejt Velipojës përballet me një trafik tejet të rënduar gjate këtyre orareve ndërsa vargu i makinave arrin deri në 3 kilometra.

Ekspertët e policisë rrugore konstatojnë se numri i lartë i makinave, rrugët e ngushta dhe mungesa e akseve alternative krijojnë vështirësi në menaxhimin e trafikut.

Mos respektimi i sinjalistikës rrugore dhe kundravajtjet e shumta sjellin një tjetër rëndim të mëtejshëm të situatës.