Turizmi shqiptar në Panairin e Pekinit

Vendi ynë merr pjesë për herë të parë në panairin ndërkombëtar të turizmit  COTTM 2015, që organizohet në Pekin (14-16 prill). Nën organizimin e Agjencisë Kombëtare të Turizmit (AKT), stenda shqiptare përfaqësohet edhe me 4 tur-operatore dhe agjenci turistike private ( Key Tours Albania, Albtours D, Intours Albania dhe ATHS). Vetëm në ditën e parë të këtij panairi janë zhvilluar takime të shumta biznesi dhe është bërë e mundur prezantimi i paketës turistike që ofron Shqipëria për një treg, i cili nga viti në vit po rritet me ritme  të shpejta. Në vitin 2014 ishin 107 milion turistë kineze, të cilët zgjodhën të vizitojnë vende të ndryshme anembanë botës, me një rritje prej afërsisht 20%, çka tregon se sa treg potencial dhe me mundësi reale për thithjen e turistëve ka ky vend.
AKT-ja po përfiton nga rasti të zhvillojë kontakte me median kineze për të mundësuar që informacioni turistik të jetë në dispozicion për turistët kineze edhe në gjuhën e tyre. Ndërkohë, po punohet në bashkëpunim me ambasadën tonë në Pekin që të organizohet një udhëtim familjarizues në Shqipëri me afersisht 15 gazetarë të mediave kineze në muajin maj ose qershor.
Interesant është fakti që stenda jonë në këtë panair po vizitohet edhe nga shqiptarë të shumtë që jetojnë dhe studiojnë në Pekin. /atsh/