Turku i drogës, vendimet
e 2 gjykatave për turkun Turgut

Abdulselam Turgut, turku për të cilin Gjykata e Lartë vendosi dy ditë më parë arrest shtëpi për 40 ditë, rezulton të jetë i dënuar me 1.6 vite burg nga Gjykata e Shkallës së Parë, për akuzën e largimit të burgosurit nga vendi i qëndrimit. Vendimi për dënimin e tij me 18 muaj burg në mungesë është dhënë nga gjyqtaria Antonela Prendi dhe se momentalisht Turgut nuk kërkohet vetëm nga drejtësia Gjermane por edhe nga drejtësia Shqiptare e cila tashmë e ka shpallur në kërkim ndërkombëtar turkun e arratisur. Sipas vendimit të gjykatës, Abdulselam Turgut pas lirimit nga gjykata e Apelit ka qëndruar në hotel "Princ" i ndodhur te Kthesa e Kamzës, prej nga më pas është larguar duke mos u arrestuar sot e kësaj ditë. Në të thuhet se Turgut duhet të vuajë dënimin në një burg të sigurisë së zakonshme ndërkohë që vendimi i Gjykatës së Lartë, bie në kontradiktë me të, duke urdhëruar masën e caktimit "arrest në shtëpi" për 40 ditë, në një kohë kur për Turgut ka një vendim dënimi me 1.6 vite burg. Telenovela e kësaj çështje, duket se ende nuk ka përfunduar pasi avokati mbrojtës i Turgut mësohet se ka apeluar vendimin e dënimit duke ia dhënë mundësinë sërisht Apelit për tu shprehur rreth arratisjes së turkut Abdulselam Turgut.
Kontrata me Gjin Pjetrin
Sipas vendimit të gjykatës më 28 mars 2011 është urdhëruar thirrja e të pandehurit Abdulselam Turgut në Prokurorinë e Rrethit Gjyqësor Tiranë me qëllim marrjen e pëlqimit për ekstradimin e tij drejt Gjermanisë, duke e njoftuar në adresën ku i pandehuri sipas vendimit të Gjykatës së Apelit Tiranë nr.118, dt 04 mars 2011 qëndronte në kushtet e masës së sigurimit"Arrest në shtëpi". Nga procesverbali i dt 29 Mars 2011 "Për njoftimin e shtetasit të lirë" ka rezultuar se shtetasi turk Abdulselam Turgut në mënyrë të paligjshem ishte larguar nga banesa ku qëndronte në kushtet e arrestit në shtëpi. Verifikimi është kryer nga oficerët e policisë gjyqësore, të cilët pasi kanë shkuar në pallatin 10 katësh të ndodhur te Kthesa e Kamzës, prapa karburant "Urani", përballë Spitalit "Hygea" kanë konstatuar se në katin e 8 të pallatit kishte 4 hyrje, nga të cilat hyrja nr. 1 ishte bosh, ndersa ne tre hyrjet e tjera banonin familjarë. Rezultoi e provuar gjatë gjykimit se i pandehuri Abdulselam Turgut kishte lidhur një kontratë qëraje nr.4701 Rep, dt 31 dhjetor 2010 me shtetasin Gjin Pjetri për marrjen me qëra të apartamentit pronësi e tij me siperfaqe 126, 5 m2, të ndodhur në katin e tetë të godinës te Kthesa e Kamzës. Kjo kontratë është paraqitur gjatë gjykimit në Gjykatën e Apelit Tiranë dhe është sekuestruar në cilësinë e provës materiale. Ekzistenca e kësaj kontrate konfirmohet dhe nga kqyrja e rregjistrit noterial të noteres Momoza Shehu. Ndërsa nga raport e shërbimit të datës 30mars 2011 i mbajtur nga Kryeinspektori i zonës është konfirmuar se i pandehuri Abdulselam Turgut për një periudhë prej 8 ditësh ka qëndruar tek Hotel "Princ" te kthesa e Kamzës.
Vendimi i gjykatës
Sipas vendimit të gjykatës vepra penale është kryer me dashje direkte pasi i pandehuri ka parashikuar veprimet e pasojat e veprës penale dhe ka dëshiruar ardhjen e tyre. Megjithëse ka qënë në dijeni të detyrimit për të respektuar ligjin dhe urdhërimin gjyqësor për të qëndruar i izoluar në ambientet e vendqëndrimit të tij në kushtet e "Arrestit në shtepi" i pandehuri Abdulselam Turgut me vullnet të plotë është larguar nga banesa, fakt që tregon paramendimin, vullnetin dhe dashjen e tij në ndërmarrjen e veprimeve kriminale. Nisur nga këto fakte i pandehuri Abdulselam Turgut dënohet me 1.6 vite për akuzën e "Largimit të burgosurit nga vendi i qëndrimit".
(sg/shqiptarja.com)