TV dixhitale, OSBE shtyn për
më vonë tryezën e diskutimeve

TIRANE- OSBE shtyn për një datë të pacaktuar tryezën e rrumbullakët, ku ishte parashikuar diskutimi projektstrategjisë për kalimin e transmetimeve radiotelevizive nga analoge në dixhitale (numerike).

Në një njoftim të djeshëm zyra e shtypit OSBE njoftoi për zhvillimin e kësaj tryeze të rrumbullakët sot paradite, në orën 09:00 në hotelin “Sheraton”, por nëpërmjet një njoftimi të mëvonshëm OSBE deklaron se tryeza është shtyrë për një ditë tjetër, por pa caktuar datën.

”Ju njoftoj se me tryeza e rrumbullaket per transmetimet dixhitale, e lajmeruar per sot, 10 janar, ora 9, ne hotelin Sheraton, do te zhvillohet ne nje date te mevonshme.”-thuhet në njoftimin e dytë të OSBE-së

Që prej vitit 2007, parlamenti ka miratuar një ligj, sipas të cilit viti 2012 do të ishte viti i fundit, gjatë të cilit do të ketë transmetime tradicionale analoge nga media televizive në vendin tonë. Pas kësaj, me detyrim, të gjithë subjektet duhet të transmetonin vetëm me teknologjinë dixhitale tokësore, apo "numerike".
Këshilli Kombëtar i Radios dhe Televizionit ka hartuar tashmë "Strategjinë për Kalimin nga Transmetimet Analoge në ato Numerike", që parashikon zgjatjen e procesit.

Sipas kryetares së KKRT, Endira Bushati, (ne foto) ky proces është kërkesë që rrjedh nga detyrimet tona si shtet-palë në dy konventa ndërkombëtare. Nuk është çështje dëshire, por detyrim. Megjithatë, deri tani kjo kërkesë ende nuk është e aplikueshme, thekson ajo, në një prononcim për gazetën “Shqiptarja.com”. Sipas saj, ky është një proces kompleks dhe i kushtueshëm; edhe disa vende të BE-së nuk arrijnë ta kryejnë atë brenda afateve, që janë zotuar t'i respektojnë. Edhe Greqia, psh ka deklaruar shtyrje deri në 2015-ën.

Gjatë tryezës së sotme, fjalimet hyrëse ishin parashikuar të mbahen nga Kryetari i Prezencës së OSBE-së në Shqipëri, Ambasadori Eugen Wollfarth, Ministri Genc Pollo, Kryetarja e Këshillit Kombëtar të Radios dhe Televizionit, Endira Bushati dhe Drejtori i Përgjithshëm i transmetuesit publik, Petrit Beci.
(sg/shqiptarja.com)

TAG:
• OSBE