E Ngarkuara me Punë e Shteteve të Bashkuara në Shqipëri, Nancy VanHorn, mirëpriti në ambientet e ambasadës familjen e Loni Adamit, duke vlerësuar guximin dhe sakrificën e tij gjatë regjimit komunist në Shqipëri.

Sipas njoftimit të ambasadës amerikane, Loni Adami dhe kolegu i tij, Kol Kuqali, të dy punonjës shqiptarë në Ambasadën e Shteteve të Bashkuara, u burgosën dhe u torturuan pasi refuzuan të dëshmonin në mënyrë të rreme kundër SHBA-së gjatë diktaturës komuniste.

Ambasada thekson se të dy humbën jetën në burg, ndërsa qëndrimi i tyre konsiderohet një dëshmi e fortë e përkushtimit ndaj lirisë dhe marrëdhënieve mes Shqipërisë dhe Shteteve të Bashkuara.

Në nder të tyre, pranë flamurit amerikan në ambasadë është vendosur një memorial kushtuar Loni Adamit dhe Kol Kuqalit, si simbol i përhershëm i sakrificës dhe kontributit të tyre.