54 vjeçari, Lefter (Krenar) Brisku ka ndërruar jetë mbrëmjen e sotme në spitalin e Traumës ku prej 6 ditësh mjekohej për plagët e marra nga dhuna që 22 vjeçari Bjorsi Shushari ushtroi ndaj tij pasi e kapi duke vjedhur 2 pula gjatë orëve të natës.

Brisku nuk ka mundur t’u mbijetojë plagëve të marra nga dhuna që i riu ushtroi ndaj tij. Fillimisht u dërgua në spitalin e Beratit për të marrë ndihmë mjekësore por pasi gjendja e tij shëndetësore u rëndua, u transportua me urgjencë drejt spitalit të Traumës ku ndërroi jetë mbrëmjen e sotme. 

Ngjarja ka ndodhur mesnatën e 25 shkurtit kur 54 vjeçari Lefer Brisku tentoi të hynte në ambientet e pronës së familjes Shushari për të vjedhur dy pula. Në atë moment është kapur nga i riu Bjorsi Shushari i cili e ka dhunuar brutalisht duke i shkaktuar fraktura të shumta në kokë të cilat më pas i shkaktuan edhe vdekjen.

Për ngjarjen, policia ka shoqëruar të riun që dhunoi barbarisht 54 vjeçarin. Ndaj tij rëndon vepra penale "Vrasja e kryer me kapërcim të kufijve të mbrojtjes së nevojshme".