Dy pjesëtarë të Gardës Kombëtare të Virxhinias Perëndimore janë qëlluar me armë në Uashington, DC, dhe gjendja e tyre mbetet e panjohur, sipas guvernatorit të Virxhinias Perëndimore, Patrick Morrisey.

Më herët, Morrisey kishte deklaruar se besohej se efektivët kishin ndërruar jetë, por më pas tha në rrjetet sociale se kishte “raporte kontradiktore” mbi gjendjen e tyre.

Sipas CNN, ngjarja ndodhi në qendër të Uashingtonit, DC.

Dy pjesëtarët e Gardës Kombëtare janë përfshirë në shkëmbim zjarri me autorin e dyshuar përpara se të qëlloheshin, sipas dy burimeve të zbatimit të ligjit. Burimet thanë se i dyshuari u ndalua dhe u transportua nga vendngjarja me barrelë. Sipas një burimi tjetër, autoritetet nuk po identifikojnë asnjë viktimë tjetër nga ngjarja e së mërkurës, përveç dy pjesëtarëve të Gardës dhe të dyshuarit.

Policia Metropolitane e DC njoftoi në X se zona është siguruar dhe një i dyshuar është në pranga. Ajo u kërkoi qytetarëve të shmangin zonën.

Një grua që ndodhej pranë vendit të ngjarjes i tha CNN se dëgjoi të shtëna dhe më pas pa “shumë njerëz” që po i jepnin ndihmë të parë me CPR personave të shtrirë në tokë.

Rrethanat e të shtënës nuk janë ende të qarta. Grupi i Përbashkët i Detyrës — DC, zyra e Gardës Kombëtare e cila koordinon misionin e Gardës në Uashington, konfirmoi në një deklaratë se “disa” prej anëtarëve të saj “u përfshinë në një të shtënë pranë stacionit të metrosë Farragut West,” duke shtuar se po punon me policinë e DC dhe agjenci të tjera të zbatimit të ligjit.

Presidenti Donald Trump është informuar për ngjarjen dhe ka komentuar mbi incidentin në Truth Social.

“Kafsha që qëlloi dy pjesëtarët e Gardës Kombëtare… është gjithashtu rëndë e plagosur, por sidoqoftë, do të paguajë një çmim shumë të rëndë,” shkroi presidenti.

Zëvendëspresidenti JD Vance, gjatë një aktiviteti në Fort Campbell, Kentucky, bëri thirrje për lutje për pjesëtarët e Gardës, të cilët ai tha se ndodheshin në gjendje kritike në atë moment. Të shtënat, shtoi ai, janë “një kujtesë e zymtë se ushtarët — qoftë aktivë, rezervë apo Gardë Kombëtare — janë shpata dhe mburoja e Shteteve të Bashkuara të Amerikës.”

Trupa të Gardës Kombëtare nga disa shtete kanë qenë të dislokuara në Uashington, DC, prej muajsh si pjesë e fushatës së presidentit Donald Trump kundër krimit në kryeqytet, fushatë që më pas është zgjeruar edhe në qytete të tjera të vendit. Trump mobilizoi Gardën Kombëtare në gusht dhe trupave iu dha autorizimi për të kryer aktivitete të zbatimit të ligjit.

CNN raportoi ekskluzivisht muajin e kaluar se trupat do të mbeten të mobilizuara në qytet të paktën deri në shkurt. Megjithatë, javën e kaluar një gjyqtare federale ndaloi mobilizimin e Gardës Kombëtare në Uashington, DC, duke vendosur se Trump dhe Departamenti i Mbrojtjes i kishin dislokuar trupat në mënyrë të paligjshme.

Në vendimin e saj, gjyqtarja tha se në qytet kishte “më shumë se 2.000 trupa të Gardës Kombëtare” çdo ditë.

Ajo nuk urdhëroi menjëherë largimin e Gardës Kombëtare nga qyteti, duke i dhënë administratës Trump pak kohë për të paraqitur apel.

 

K.M/r.k./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 3 Dhjetor, 08:56

    Çfarë mendoni për lëvizjen e Salianjit brenda PD?

Lajme të tjera