UEFA nis hetimin për serbët dhe
kuqezinjtë...por harron dhunën!!!

Sfida u ndërpre në minutën e 41 për shkak të hedhjes së fishekzjarrëve në fushë, teksa më pas gjendja agravoi edhe me valëvitjen e flamurit me shqiponjën kuqezi dhe hartën etnike shqiptare mbi Beograd. Dhuna masive e ushtruar nga tifozët dhe personali i sigurisë së Serbisë në stadium bëri që FSHF të mos humbiste asnjë minutë kohë duke depozituar pranë Komisionit të Disiplinës së UEFA-s raportin për gjithçka ndodhi, të njëjtën gjë bëri edhe FSF, por ajo që të merret më shumë për bazë është relacioni i gjyqtarëve të ndeshjes. FSHF ka vendosur në dispozicion të gjitha pamjet filmike që deri tani kanë bërë xhiron e botës, ndërsa FSF shkruan se cdo gjë erdhi si pasojë e provokimeve të shqiptarëve me flamurin. Kjo ka bërë që UEFA, organizmi më i lartë i futbollit Evropian të nisë hetimet. Serbët akuzohen për hedhjen e sendeve të forta, fishekzjarrëve dhe objekteve të tjera të rrezikshme në fushë, trazira në shkallët e stadiumit, hyrje e tifozëve në fushë, mosmarrjen e masave të nevojshme për zhvillimin normal të ndeshjes dhe drejtim lazerash ndaj futbollistëve kundërshtarë, por fjala dhunë mungon. Shqipëria do të hetohet për refuzimin e vazhdimit të lojës dhe shfaqjen e flamurit të paligjshëm në stadium. Ndeshja në Beograd u braktis pas kaosit për shkak të një droni të telekomanduar, i cili shfaqi një flamur të Shqipërisë së Madhe në fushën e lojës, duke nxitur kështu një përleshje mes lojtarëve dhe dhjetëra tifozëve.

UEFA “harron” dhunën 
Ajo që bie në sy në akuzat e ngritura nga UEFA për incidentet në fushën e lojës në Beograd është fakti që organizmi më i lartë i futbollit Evropian nuk e përmend asnjëherë fjalën dhunë. Mungon akuza për përdorimin e gjesteve, objekteve apo mjeteve të tjera që transmetojnë mesazh jo të denjë për futbollin dhe sidomos mesazhe politike, ideologjike, besimi, ofenduese. Në akuzë harrohet djegia e flamurit shqiptar, të NATO-s apo dhe posterat me Vojislav Seshelj, kriminel lufte. Edhe pse pamjet tmerruese bënë xhiron botës me foto dhe video të dhunës ndaj Xhakës, Balës, Lilës, Mavrajt, Canës dhe pjesës tjetër të ekipit. Shqipëria akuzohet për refuzimin e vazhdimit të lojës, lojtarët e goditur fizikisht e psikologjikisht, duhet të futeshin në fushë, mbase dhe të vriteshin, ndoshta sipas UEFA-s. Akuzat e ngritura nga UEFA nëse janë bazuar te relacioni i gjyqtarëve, atëherë do të thotë se arbitri anglez Akniston dhe pjesa e tjetër, përfshirë delegatin nuk e kanë shënuar që futbollistët shqiptarë dhe tifozët u përleshën, madje u goditën me karrige dhe sende të tjera. Gjyqtari Martin Atkinson urdhëroi menjëherë lojtarët të dilnin nga fusha, pas incidentit, i cili ndodhi në fund të pjesës së parë, teksa u drejtuan për në tunelin e dhomave të zhveshjes, ata sërish u sulmuan me sende të forta. Pas rikthimit të rendit lojtarët e Shqipërisë refuzuan të ktheheshin në fushë, duke mos lënë asnjë alternativë veç anulimit të ndeshjes. Mesa duket lobi serb ka një ndikim të fuqishëm edhe në devijimin e akuzave, megjithatë gjithçka më qartë do të mësohet më datë 23 Tetor.