Në një ceremoni ku ishin edhe ish presidentët Alfred Moisiu e Fatmmir Sejdiu, si dhe ministri i Financave i Kosovës, Avdullah Hoti, u ndanë çmimet vjetore Karriera, Gazetari i Vitit, Çmimi Special, si dhe çmim "Vangjush Gambeta" për gazetarinë ekonomike.
Në kuadër të veprimtarisë, u bë edhe nënshkrim i memorandumit të bashkepunimit të Unionit të Gazetarëve Shqiptarë me Unionin e Gazetarëve të Preshevës.
Çmimi Karriera iu nda korrespondentit të ATSH nga Kosova e themelues i bashkëpunimeve të para të medias Kosovë-Shqipëri prej gati çerek shekulli, Behlul Jashari, gazetar shumëvjeçar, redaktor e kryeredaktor i gazetës tradicionale kosovare Rilindja dhe pas ndalimit të saj në vitet e okupimit kryeredaktor i parë-themelues i gazetës së rezistencës 'Bujku", i vlerësuar "dëshmia e gjallë e qëndresës së gazetarit përballë shtypjes dhe terrorit okupues" siç theksohet në motivacionin e prezantuar nga kryetari i Unionit të Gazetarëve Shqiptarë, Aleksandër Çipa.
Po ashtu, Çmimi Karriera iu nda Gazetarit nga Kosova Zenun Çelaj, një prej veteranëve të gazetarisë kosovare e shqiptare në përgjithësi, cili siç u theksua në motivacion "ka pasur fatin të jetë dëshmitar dhe raportues i ngjarjeve më të rëndësishme të pesë dekadave në jetën dhe në historinë e Kosovës". Çelaj një kohë të gjatë ishte gazetar e redaktor shumë i vlerësuar në gazetën historike të Kosovës Rilindja e aktualisht është kryeredaktor i portalit Koha.net.
Çmimi Karriera iu nda edhe gazetarit nga Shqipëria Besnik Dizdari, i vlerësuar në motivacion "një personalitet i gazetarisë sportive në hapësirën dhe mediat shqiptare me një karrierë mbi 50 vjeçare" dhe si "një protagonist në historinë e gazetarisë sportive dhe atë shqiptare në përgjithësi".
Çmimin Special e morën Engjëll Seriani e Flutura Tota, çmimin Gazetari i Vitit Lindita Çela, çmimin "Vangjush Gambeta" Ola Xama, Parim Olluri, Laura Papraniku, Kreshnik Kuçaj.
Duke pranuar çmimin, gazetari Behlul Jashari, u shpreh se ndihet shumë i nderuar që merr çmimin më të lartë të gazetarisë shqiptare, derisa theksoi se para një çerek shekulli nisi raportimet për median në Shqipëri nga Kosova në rrethana të jashtëzakonshme dhe pjesë e atyre raportimeve ishte edhe reportazhi për "kufirin ndërshqiptar si mur, si fundi i botës"
![](https://www.shqiptarja.com/template/img/sh_logo1.png)