Vaksinimi i fëmijëve, histori suksesi në Kosovë

Vaksinimi i fëmijëve është një nga historitë më të suksesshme në shëndetësinë kosovare.
Kështu u tha sot në fillimin e Javës Botërore të Vaksinimit (24-30 prill 2015), që shënohet me aktivitete të organizuara nga Ministria e Shëndetësisë, në bashkëpunim me UNICEF-in, OBSH-në dhe IKSHP-në.
Përfaqësues të institucioneve të Kosovës dhe të UNICEF-it e OBSH-së, theksuan sot progresin e arritur në Kosovë në sigurimin e të drejtës së fëmijëve për një jetë të shëndetshme përmes imunizimit, por edhe boshllëqet e mbetura për të siguruar që të gjithë fëmijët e Kosovës të mbulohen nga Programi Kombëtar i Vaksinimit (PZI).
Ministri i Shëndetësisë, Imet Rrahmani, tha se vaksinimi është forma më e lehtë, më e lirë dhe më efikase për parandalimin e shumë sëmundjeve dhe mbrojtjen e fëmijëve. Ai tha se falë përkushtimit të institucioneve dhe punës së palodhshme të profesionistëve shëndetësor, Kosova ka arritur një shkallë të lartë të imunizimit të fëmijëve me rreth 95 për qind dhe MSH ka arritur të krijojë një stabilitet të qëndrueshëm sa i përket sigurimit të vaksinave për Programin e Zgjeruar të Imunizimit.
Ai falënderoi për këtë sukses IKSHP-në dhe partnerët ndërkombëtarë, UNICEF-in dhe OBSH-në.
Ndërsa, Laila Omar Gad, shefe e Zyrës së UNICEF-it në Kosovë, bëri thirrje për mbulimin me vaksinim edhe të fëmijëve që janë nga kategoritë e pambrojtura apo të margjinalizuara. Ajo përgëzoi institucionet dhe profesionistët shëndetësor në Kosovë për shkallën e lartë të vaksinimit të arritur, por bëri thirrje për fuqizimin e aktiviteteve për mbulim më të mirë me vaksinim të komunitetit rom, ashkali e egjiptian, duke theksuar se imunizimi është ndërhyrja më efektive për të siguruar mbrojtjen e fëmijëve.
Në mbarë botën, vaksinimi kursen 2-3 milionë fëmijë çdo vit nga sëmundjet vdekjeprurëse të fëmijërisë si fruthi, diareja dhe pneumonia./atsh/

TAG:
• fruthi