Shtetet e Bashkuara të Amerikës dhe Bosnie Herzegovina po negociojnë për ndërtimin e një gazsjellësi me vlerë rreth 200 milionë dollarë, që konsiderohet i një rëndësie strategjike për sigurinë energjitike të rajonit. Në këto bisedime, janë angazhuar dy persona të lidhur me rrethin e ngushtë të Presidentit Donald Trump.

Bëhet fjalë për Joe Flynn dhe Jesse Binnall, pjesë e ekipit ligjor të Trump për të kundërshtuar rezultatin e zgjedhjeve presidenciale të vitit 2020. Të dy ndodheshin këtë javë në Sarajevë për të diskutuar projektin e gazsjellësit “Southern Gas Interconnection”.

Projekti parashikon ndërtimin e një gazsjellësi rreth 235 kilometra të gjatë, i cili do ta lidhë Bosnjen me një terminal të gazit të lëngshëm në bregdetin kroat të Adriatikut. Qëllimi është që Bosnja të furnizohet me gaz nga Shtetet e Bashkuara dhe tregje të tjera, duke zvogëluar kështu varësinë pothuajse totale nga gazi rus.

Binnall deklaroi se kompania që ai dhe Flynn përfaqësojnë, AAFS Infrastructure and Energy, nuk e ka fituar ende kontratën dhe se takimet me autoritetet boshnjake janë në fazë eksploruese. Sipas tij, bisedimet synojnë të vlerësojnë mundësinë e përfshirjes së kapitalit privat amerikan në projekt.

AAFS Infrastructure and Energy është regjistruar në shtetin amerikan Ëyoming vetëm dy muaj më parë dhe nuk ka një përvojë të njohur në sektorin e gazit apo infrastrukturës energjetike. Në faqen e saj zyrtare, kompania pretendon përvojë të gjatë në energji dhe financa, por pa bërë publike emrat e drejtuesve apo projekte të mëparshme.

Takimet në Sarajevë u zhvilluan me praninë e përfaqësuesve të ambasadës amerikane, e cila sipas një njoftimi publik ka mbështetur diskutimet mbi rolin e kapitalit amerikan në këtë projekt.

Joe Flynn dhe Jesse Binnall me të ngarkuarin me punë në Ambasadën Amerikane, John Ginkel në Sarajevë  

Bosnja dhe Hercegovina importon pothuajse të gjithë gazin e saj nga Rusia, ndryshe nga shumica e vendeve europiane që pas pushtimit të Ukrainës në vitin 2022 kanë kërkuar burime alternative energjie. Gazsjellësi “Southern Gas Interconnection” shihet si një projekt kyç për shkëputjen nga varësia energjetike ndaj Moskës.

Joe Flynn është vëllai i Michael Flynn, ish-këshilltar për sigurinë kombëtare të Trump gjatë mandatit të tij të parë, i dënuar në vitin 2017 për deklarata të rreme ndaj FBI-së lidhur me kontaktet me Rusinë dhe i falur nga Trump në vitin 2020.

I pyetur nëse lidhjet e tij dhe të Flynn me Trump përbëjnë konflikt interesi, Jesse Binnall deklaroi se mbështetja e ambasadës amerikane është pjesë e praktikës standarde për promovimin e bizneseve amerikane jashtë vendit dhe se kompania po vepron përmes kanaleve normale diplomatike dhe tregtare.