Veliaj në Samitin e Kryebashkiakëve Europianë në Strasburg: Pavarësisht pakicës që proteston, Shqipëria ka miq ndërkombëtarë që duan të avancojë në BE

Kryetari i Bashkisë së Tiranës, Erion Veliaj mori pjesë në Samitin e Kryebashkiakëve Europianë në Strasburg, ku u takua me anëtarë të Parlamentit Europian, duke marrë miratimin e tyre për mbështetjen e Shqipërisë në procesin e integrimit në BE.

Në vijim të vizitës së tij në Strasburg, Veliaj u takua edhe me deputetin tjetër të Parlamentit Europian, Raphael Glucksmann, dhe ish kryebashkiakun e Barit, Antonio Decaro. Gjatë takimit me Glucksmann, Veliaj tha se pavarësisht pakicës që proteston, Shqipëria ka miq ndërkombëtarë që duan të avancojë në BE

“Antonio Decaro ka zgjedhur që në PE të jetë në grupin e marrëdhënieve mes PE dhe Shqipërisë. Ndërkohë që, disa prej nesh që gjithmonë do i vënë një stërkëmbësh Shqipërisë, fatmirësisht janë pakica, jo shumica. Por, ka edhe shumë miq, që në fakt si antidot i atyre që duan të helmojnë frymën e bashkëpunimit dhe integrimit, janë ata miq të Shquipërisë që ndonjëherë e duan Shqipërinë më shumë se ca prej nesh”, u shpreh ai.

LEXO EDHE:
Kreshnik Spahiu: Pse Strasburgu po e zhgënjen shumë keq Partinë Demokratike?

Në takimin me deputetin europian, Dario Nardella, kryebashkiaku Veliaj u shpreh se ai ka një lidhje të hershme me Tiranën pas projekteve të përbashkëta në kohën kur drejtonte Bashkinë e Firenzes, duke e cilësuar si një avokat të Shqipërisë.

“Është kënaqësi e veçantë të takoj mikun tim, Dario Nardella, me të cilin si kryetar i Bashkisë së Firences kemi bërë projekte të pafundme, por sot kemi vërtet një avokat të Shqipërisë në Bashkimin Evropian. Fakti që kemi hapur negociatat, hapëm Kolegjin e Evropës në Tiranë, shumë prej kapitujve kanë marrë rrugën e mbarë të zbatimit, dhe fakti që qeveria Rama po insiston që të hyjmë sa më shpejt në BE me shokë si Dario, të cilët kanë qenë fillimisht kryetarë bashkie të qyteteve të rëndësishme, por tani janë avokatët tanë në gjithë vendimmarrjet e BE, është një lajm i mirë për Shqipërinë. Në këtë takim të Eurocities më vjen mirë që takoj kaq shumë miq të Shqipërisë, edhe kur disa shqiptarë, një pakicë shumë e vogël, protestojnë kundër Shqipërisë që të avancojë në BE. Fat i madh është që Shqipëria është e rrethuar me shumë miq ndërkombëtarë, që duan që Shqipëria të shkojë përpara dhe duan që Shqipëria të bëhet sa më shpejt pjesë e familjes evropiane”, u shpreh Veliaj.

Nga ana e tij, deputeti Dario Nardella tha se një nga objektivat e tij si anëtar i Parlamentit Europian, do të jetë të ndihmojë Shqipërinë në përshpejtimin e procesit të integrimit në BE.

“Jam shumë i lumtur që ndodhem këtu, në Parlamentin Europian në Strasburg, me mikun tim Erionin, kryebashkiakun e Tiranës, me të cilin kemi çuar përpara shumë projekte së bashku. Unë jam anëtar i Parlamentit Europian dhe një nga objektivat e mi do të jetë ai për të ndihmuar Shqipërinë në përshpejtimin e procesit të integrimit në BE. Ne duhet të sjellim stabilitet, paqe dhe progres ekonomik e social në të gjitha fushat ku Shqipëria është një pikë referimi. Sepse është një port në Adriatik, gjithashtu edhe një urë lidhëse me vendet e Europës Lindore; pra, një vend i rëndësishëm që nuk mund të mbetet jashtë BE-së. Angazhimi edhe i kolegëve të mi italianë në Parlamentin Europian synon forcimin e procesit të integrimit të shtetit shqiptar në BE, për progresin e qytetarëve shqiptarë, italianë dhe të të gjithë qytetarëve europianë”, theksoi ai.

Veliaj ndodhet në Strasburg si pjesë e Samitit të Kryebashkiakëve Europianë. Samiti është një takim politik i nivelit të lartë mes kryetarëve të bashkive europiane dhe anëtarëve të sapozgjedhur të PE, ku kryetarët e bashkive do të ndajnë vizionin e tyre për mandatin e ardhshëm të Bashkimit Europian.

S.B/I.M/Shqiptarja.com

TAG:
• erion veliaj
• Strasburg
• BE
• Raphael Glucksmann
• Antonio Decaro