Në një takim me strukturat e Partisë Socialiste në Kamzë, me fokus tek zgjedhjet e 14 Majit, drejtuesi politik i PS për Qarkun e Tiranës, Erion Veliaj, tha se në këto 4 vjet qyteti i Kamzës është kthyer në model, për të gjitha investimet në kopshte, çerdhe, shkolla etj. I shoqëruar nga deputetja e PS, Lindita Nikolla dhe kryetari i Bashkisë së Kamzës, Rakip Suli, Veliaj shtoi se Tirana dhe Kamza janë si dy mushkëri ekonomike, ndërsa në 14 maj njerëzit duhet të shohin punën e mirë që ka bërë këto 4 vjet kryebashkiaku Rakip Suli.
“E them me krenari, si në Tiranë, edhe në Kamzë, kemi dy mushkëri ekonomike, biznesi, arsimi dhe të një zhvillimi të jashtëzakonshëm urban. Sot familja jonë në Kamzë është model, është e balancuar dhe është gati për fitore në datën 14 maj, edhe për të gjitha punët që do të vijnë më pas. Unë jam shumë krenar për atë që ka bërë Rakipi në 4 vjet. Unë në Tiranë kam pasur dyfishin e kohës, por transformimi në Kamzë ka ndodhur vetëm në 4 vite”, tha Veliaj.
Për kundërshtarët politikë, Veliaj tha se ata janë ‘vulëhumbur’, që kanë hallin e tyre dhe jo të popullit dhe se Kamzën e shohin si një depozitë për sherr në bulevard.
“Po shikoja skenat e protestës së fundit, kur po vinte revolucioni në Tiranë, ishin nisur 10 makina nga Kamza, ca Range Rover dhe Mercedesë të tipit të fundit, dhe thashë: ‘Shih çfarë vizioni ka një parti për Kamzën!’. E sheh vetëm si depozitë makinash të shtrenjta, me xhirime gomash dhe mitingashë. Ky është vizioni i një partie që ka qeverisur Shqipërinë gjatë gjysmës së tranzicionit. Ndërkohë, vizioni i Rakipit dhe PS për Kamzën ka qenë promovimi si në një familje. Nuk i bëjmë dot të gjitha! Edhe në një shtëpi mund të ketë shumë dëshira, por ti thua, të vegjëlve s’do u lëmë gjë mangët, dhe me punën që është bërë me çerdhet, kopshtet, shkollat e Kamzës, Rakipi nuk i ka lënë gjë mangët fëmijëve”, tha Veliaj.
Drejtuesi politik i PS-së për qarkun e Tiranës, Veliaj tha se pyetja që gjithsecili duhet t’i bëjë vetes është: “Do jetojmë për disa njerëz që kanë pasur mundësi t’i shërbejnë Kamzës e Shqipërisë dhe vazhdojnë e trajtojnë Kamzën e Shqipërinë vetëm si depozitë për interesin e tyre, për vulën, për postin e tyre? Po të ‘thereshin’ ata, siç ‘theren’ për vulën edhe për arsimin, për promovimin e gruas në shoqëri, për emancipimin; të ‘thereshin’ siç ‘theren’ për selinë, edhe për çerdhet, kopshtet, shkollat; të ‘thereshin’ kështu edhe për transportin publik, siç ‘theren’ për Range dhe Mercedesët e tyre, ky vend do të ishte bërë që kur e kishin ata në dorë. Por, qartazi ata na provuan se edhe kur e kishin në dorë, edhe tani, shohin vetëm interesin e tyre. Thirrja për çdo demokrat në Kamzë është: Nuk e duam për dhëndër Rakipin! Nuk e duam për krushqi Rakipin! E duam që ta ngarkojmë me punë, që të vazhdojë t’i mbarojë të gjitha shkollat, të gjitha shtëpitë, parqet, shesh-pushimet e pallateve, të gjitha projektet”.
Veliaj nënvizoi se parti, familje dhe skuadër më të mirë, më dinjitoze, më profesioniste, më patriotike se Partia Socialiste e Shqipërisë nuk ka dhe nuk ka për të pasur.
Në prag të 7-8 Marsit, drejtuesi politik i PS për Qarkun e Tiranës, Erion Veliaj zhvilloi një takim edhe me gratë dhe vajzat e Kamzës, të cilat i uroi edhe në prag të festës së 8 Marsit. Ai tha se gratë dhe vajzat janë themeli i një Kamze të fortë, por edhe i një Tirane dhe i një Shqipërie të fortë.
“Takimi i parë i qytetarit të ri të Kamzës me shtetin janë çerdhja, kopshti dhe shkollat, ndaj dua ta falenderoj Rakipin që i ka dhënë rëndësi fëmijëve, sepse ndihma më e madhe që mund t’i jepet një nëne është ta ndihmosh që fëmijët të shkojnë në çerdhe, kopshte dhe shkolla dinjitoze. Nuk janë as gishtat përpjetë, as grushtat lart, ato çka e ndihmojnë një nënë, por një institucion ku fëmija rritet me dashuri, me të njëjtin dashuri dhe kujdes që ka edhe në shtëpi. Kush harron të tashmen dhe kush ngatërron që të punojë për zgjedhjet e ardhshme dhe jo për gjeneratën e ardhshme, do t’i humbë edhe zgjedhjet, edhe gjeneratën e ardhshme. Kush punon për gjeneratën e ardhshme dhe ka besim se fëmija është themeli i një Kamze të fortë, i një Tirane të fortë, i një Shqipërie të fortë, ai do të fitojë edhe zgjedhjet e ardhshme, por mbi të gjitha gjeneratën e re”, tha Veliaj.
Kryebashkiaku i Tiranës, Veliaj vlerësoi gratë dhe vajzat e Kamzës, të cilat kanë sakrifikuar për të krijuar familje të mrekullueshme.
“Kam një respekt të jashtëzakonshëm për vajzat dhe gratë e Kamzës, sepse nga hiçi kanë krijuar një vatër, një shtëpi dhe kanë krijuar një komunitet të jashtëzakonshëm si ky që kemi në Kamzë. Mua më bëhet zemra mal që, si kryetar i Bashkisë dhe drejtues politik i Qarkut, të shikoj dëftesat dhe renditjen e nxënësve. Më vjen mirë që në qarkun tonë nxënësit dhe nxënëset e Kamzës janë ‘on top’. Fakti që sot nxënësit më të mirë në gjimnaze dhe studentët më të mirë të universiteteve janë nga familjet dhe nga sakrificat e grave dhe nënave e gjysheve të Kamzës, është një kompliment shumë i madh dhe është një shpërblim shumë i madh i kësaj sakrifice”, tha Veliaj.
Në fund, ai u bëri thirrje vajzave dhe grave të Kamzës që, siç kanë ndërtuar me mund e me sakrifica familjen e tyre, të jenë krah Partisë Socialiste për të kthyer në histori suksesi Kamzën.
“Kur ti shikon skena të atyre që djegin shtëpinë e tyre, pyetja për çdo demokrat duhet të jetë: Këta që djegin shtëpinë e tyre, do ta rregullojnë shtëpinë time? Këta që hipin mbi Range Rover dhe makina të shtrenjta, do t’ju flasin për varfërinë, kalaqafë në parkimin e partisë, këta që nuk rregullojnë dot gropën dhe asfaltin te partia e tyre, këta që nuk vënë dot një vijë parkimi, dhe makinat i parkojnë mullar, këta do të sjellin rend, dhe do të sjellin disiplinë dhe do të sjellin rregull dhe do të sjellin pastërti dhe do të merren këta me shtëpitë tona që djegin shtëpinë e tyre? Ndaj, për sa kohë që provën e keni që me Rakip Sulin këtu, me Lindita Nikollën, modelin e gruas socialiste në krye të Parlamentit Shqiptar, thirrja është për çdo dibrane, çdo kuksiane, çdo krutane, çdo matjane, çdo lezhjane, siç kemi ndërtuar me thonj, me sakrifica me mund dhe me djersë familjet tona, këtu në Kamzë, për ta kthyer në histori suksesi, ashtu do të duhet me mund, me përpjekje, me dashuri dhe me pasion ta ndihmojmë Rakipin në datën 14 maj, PS, gocat tona në Këshillin Bashkiak, që të vazhdojnë punët e mira për Kamzën dhe Shqipërinë”, përfundoi Veliaj.
Lajme të tjera
-
Asani vë në alarm Sylvinhon, analiza të detajuara për Ukrainën! Kuqezinjtë stërviten pas ndeshjes me Çekinë
17 Nëntor, 14:31 -
Kamëz/ Shpërthim në godinën e përshtatur si studio muzikore, shkaktohen vetëm dëme materiale
17 Nëntor, 10:58 -
Sot 80 vjetori i Çlirimit të Tiranës nga pushtuesit nazistë, homazhe te ‘Ushtari i Panjohur’! Veliaj: Të lëmë përçarjet për përparimin e shoqërisë
17 Nëntor, 08:29 -
Liga e Kombeve/ S'ka 'krisma' në Tiranë, Shqipëria dhe Çekia barazojnë 0-0! Grupi B1 i hapur, të martën vjen Ukraina
16 Nëntor, 22:46 -
Rehabilitohet blloku i banimit në Njësinë 3, Veliaj: Tirana, një kantier investimesh, buxheti 2025, më transformuesi
16 Nëntor, 13:07 -
Prokuroria e Tiranës dërgon për gjykim biznesmenin Julian Morina! Ndërtoi pa leje në Tiranë në një sipërfaqe prej 16 mijë metra katror
16 Nëntor, 10:26 -
Vrasja e Eduart Reçit/ Policia kthehet në vendin e krimit! Prova për të zbuluar nga qëlluan autorët! Biznesmeni i ndërtimit mund të jetë vrarë me armë sportive
16 Nëntor, 10:11
-
Tiranë, ndalohet 16 vjeçari, akuzohet se shpërndau në rrjete sociale foto e video porno të një të mitureje
16 Nëntor, 08:51 -
Sot në 20:45 Shqipëri - Çeki/ 'Blindohet' Tirana, rrugët që bllokohen dhe kontroll për tifozët! Policia tregon planin e masave
16 Nëntor, 07:53 -
Kokaina nga Amerika Latine përpunohej në laborator në Fushë Krujë e çohej në BE! Baza edhe tek 'Kodra e Diellit 2'! SPAK: 10 të arrestuar mes tyre 3 të huaj! Në 48 ton lëkurë gjedhi fshihet droga e importuar (EMRAT)
16 Nëntor, 07:23 -
Gjakmarrjet mes fiseve Toptani, Bargjini dhe Jella për të rrëmbyer Tiranën! Esencë
15 Nëntor, 21:19
-
Operacion antidrogë, zbulohet laborator në Qerekë të Niklës! Kontrolle te rezidenca e VIP-ave 'Kodra e Diellit' në Tiranë, disa të arrestuar! Udhëhiqet nga SPAK e autoritetet spanjolle (VIDEO)
15 Nëntor, 19:38
