DURRES-Gjykata e Shkallës së Parë ka vendosur që të shtyjë vendimin për kërkesën e bashkisë për heqjen e pezullimit të punimeve për projektin ‘Veliera’.
 
Gjyqtari i çështjes Petraq Çuri vendosi shtyrjen e gjykimit për shkak se kërkoi kohë që të studiojë më mirë relacionin e Ministrisë së Kulturës lidhur me këtë projekt.
 
Ai ka kërkuar dy ditë kohë për të dalë në një vendim për projektin ‘Veliera’ në datë 29 shtator, ditën e premte.
 
Seanca në bashkinë e Durrësit u zhvillua sot paradite me dyer të mbyllura. Pas zhvillimit të seancës, Sazan Guri theksoi se ka një tendencë për të gjunjëzuar gjyqësorin nga ana e pushtetit ekzekutiv.
 
“Ministrja e Kulturës miraton një projekt, që i vjen 6 ditë më vonë, projekti me një faqe, pa shpjegues teknik dhe arkeologjik. Veliera është me 4 këmbë, 2 janë në zonën A, ku e mbështet ministrja dhe i dyti kryetari i baskisë, që ngul këmbë, kjo është një kokderrësi të matesh me historinë e qytetarëve durrsakë. Qeveria kërkon të gjunjëzojë gjyqësorin” deklaroi Sazan Guri.

Ndërsa avokatja Mirela Jorgo theksoi se relacioni i ministrisë së kulturës është shumë i thatë. Ajo insiston në kërkesën për bllokimin e punimeve të projektit Veliera.
 
“Bashkia e Durrësit ka bërë një kërkesë për heqjen e masës së sekuestros preventive. Ndërkohë bashkia paraqet provat e veta, kishte një projekt pa standarde, prokuroria kërkoi kohë për ta shqyrtuar cështjen në lidhje me provat që kishte paraqitur ministrja. Në 29 tetor në orën 14:30 vendoset.
 
 Por prokurorja nuk ka kërkuar mbyllje të cëshjes. Ajo kërkoi 5 ditë, ndërsa gjyqtari vendosi 2-3 ditë. Ne si shoqëri civile insistojmë që është e padrejtë të hiqet masa pa u shqyrtuar cështja në themel dhe kush është fajtor, pasi ndërtimi është në zonë arkeologjike” tha ajo.

Kjo cështje po gjykohet në dy gjykata, edhe te Administrativja edhe e Faktit, të dyja vendosën pezullimin.
 
Punimet janë pezulluar në zonën ‘A’ në muajin shkurt pas kërkesës së shoqërisë civile.