Me largimin e tij nga drejtimi i Ministrisë së Mbrojtjes pas ndryshimeve në qeveri, Pirro Vengu i ka kaluar stafetën Ermal Nufit. Në ceremoninë që u zhvillua në garnizonin Skënderbej, Vengu, i cili tashmë rikthehet tashmë si deputet i qarkut të Vlorës, tha se “nuk e përjeton si largim nga misioni i sigurisë kombëtare”.

“Sot nuk po largohem nga një detyrë, po mbyll një kapitull shërbimi dhe po hap një tjetër, me të njëjtën përgjegjësi, me të njëjtin betim ndaj Republikës”, tha Vengu në çelje të fjalimit të tij.

Vengu shprehu bindjen se nën drejtimin e Nufit, gjithçka është në duar të sigurta, ndërsa misioni vazhdon.

“Ta dini se kalimi im me kohë të plotë si deputet i Vlorës, nuk e përjetoj si largim nga misioni i sigurisë kombëtare, përkundrazi, siguria e Shqipërisë sot mbrohet si në terren, ashtu edhe në tryeza të tjera diplomatike e politike, si me uniformë, ashtu edhe në aleanca të qëndrueshme. Në detyrën e re plot mirënjohje për mbështetjen nga kryeministri Rama, do ta mbaj gjithmonë me vete frymën e kësaj ministrie, qartësi në qëllim, disiplinë në veprim dhe besnikëri ndaj interesit kombëtar. Puna me njerëzit me uniformë më ka mësuar përulësinë duke më treguar se autoriteti nuk buron nga zëri i lartë, por nga përgjegjësia e heshtur. Më ka mësuar vetëpërmbajtjen në raport me bindjet që secili i konsideron si të vërteta absolute. Më ka mësuar kujdesin në raport me të tjerët. Lufta është gjithmonë tragjedi, por përgatitja është e domosdoshme sepse për të ndalur armët, duhen armë dhe këtu qëndron pesha morale e misionit. S’ka nder më të madh sesa t’ia dedikosh jetën diçkaje që na tejkalon të gjithëve. Kjo ministri e di shumë mirë çmimin e përgjegjësisë. Pas çdo uniforme ka një histori, pas çdo angazhimi ka një sakrificë dhe pas çdo plage ka një qenie njerëzore që meriton të dëgjohet. Kam fatin t’ia dorëzoj stafetën një tjetër miku dhe bashkëluftëtari të mirë. Jam i bindur se me atdhedashurinë dhe vendosmërinë e tij do të shkëlqeni. Institucioni është i fortë, Shqipëria është në duar të sigurta dhe misioni vazhdon. Këtë ministri e lë me shumë respekt, shërbimin ndaj Republikës e vazhdoj me të njëjtin betim. Faleminderit për besimin!”, tha Vengu.

Ndërsa falënderoi kryeministrin Rama për besimin ndaj tij si ministër i ri i Mbrojtjes dhe i shprehu mirënjohjen Pirro Vengut për kontributin, Ermal Nufi tha se e merr këtë detyrë me nder e përkushtim.

“Sot marr detyrën si ministri i Mbrojtjes me ndjenjë të thellë nderi, mbi të gjitha me vetëdije të plotë për rëndësinë që mbart ky institucion për sigurinë e vendit”, tha ai duke u shprehur i emocionuar për zhvillimin e ceremonisë në garnizonin Skënderbej që e quan “simbol të traditës, disiplinës dhe formimit të elitës së ushtrisë”.

“Çdo dorëzim detyre është të dimë që institucionet forcohen aty ku ndërtohet mbi vazhdimësinë dhe respektin e punës së atyre që kanë shërbyer para nesh. Strategjia nuk ndërtohet veç me strategji e dokumente, por ndërtohet çdo ditë nga njerëzit që punojnë, burrat e gratë që veshin uniformën, komandantët e drejtuesit që marrin vendime të vështira institucionet që qëndrojnë fort në kohë pasigurie. Sot dua të shpreh respektin tim më të thellë për çdo pjesëtar të Forcave të Armatosura e çdo organi varësie që kjo ministri ka. Ju mbroni territorin e vendit tonë, garantoni sigurinë e qytetarëve tanë, përfaqësoni Shqipërinë me nder. Në familjen time ka pasur burra e gra që kanë shërbyer në forcat e Armatosura të këtij vendi, ndër brezat e parë të oficerëve që kanë sakrifikuar jetën e familjen për të ndërtuar një ardhe të sigurt. Shërbimi ndaj atdheut është detyrë që s’vjen pa sakrifica,është përgjegjësi që s’vjen pa barra, është privilegj që të bën krenar gjithmonë. Nuk vij në ministri për të punuar vetëm. Do të punoj ngushtë me të gjithë për të forcuar më tej kapacitetet e sigurisë së këtij vendi”,  përmbylli Nufi.

Në fund, dy ministrat shkëmbyen një përshëndetje të përzemërt, ndërsa Vengu nderoi ushtarakisht të pranishmit.

Rendit zhvillimet sipas orarit:
Ora 11:34
Koçiu mbyll ‘kapitullin’ te Punët e Brendshme: Rrugëtimi për Shqipërinë në BE vijon

Pasi zyrtarisht mori detyrën si zv/kryeministre Albana Koçiu i ka dorëzuar stafetën një ditë më parë Besfort Lamallarit, ministrit të ri të brendshëm.

Përmes një postimi në rrjetet sociale, Koçiu mbyll kapitullin e saj në drejtim të Ministrisë së Brendshme duke falënderuar bashkëpunëtorët dhe të gjithë punonjësit me uniformë.

“Ndihem mirënjohëse që këtë mision e ndava me një skuadër profesionistësh që punoi me përkushtim dhe në sinkron të plotë. Disa kapituj mbyllen, por rrugëtimi për Shqipërinë evropiane vazhdon. Jam krenare që jam pjesë e kësaj historie pune dhe përkushtimi.”-shkruajti Koçiu në rrjetet sociale. 

SI.E./Shqiptarja.com