Vetëm për nënat e mira

Duket si një gjë e lehtë. E bëjnë të gjitha, ose shumica. E kanë bërë gjithnjë, kanë bërë shumë fëmijë… i kanë rritur, edukuar dhe cikli vazhdon.

Tetë marsi erdhi sërish dhe në Tiranë, në mbarë Shqipërinë, është një rast i mirë që gratë dhe nënat të festojnë. Të ndjehen të përkëdhelura dhe jam e lumtur për çdo grua që të ndihet e lumtur, duke protestuar apo duke festuar. Si të dëshirojë.

Në këtë 8 mars do të doja të bëja një urim të pjesshëm. Jo të gjitha nënat janë njësoj. Do të doja të uroja vetëm nënat e mira. Ato që, kur dëshirojnë të bëjnë një fëmijë, e bëjnë sepse dashuria është aq e madhe sa e ndjejnë të nevojshme të krijojnë, si një artist që ndjen se ka ardhur momenti të realizojë kryeveprën e tij.
Uroj për këtë 8 mars nënat që mbajnë 9 muaj në bark fëmijën sikur të kenë thesarin dhe diamantin më të çmuar të jetës, që duhet përkëdhelur, dashuruar.

Uroj për këtë 8 mars nënat që mirësjelljen, edukatën e kanë si qëllim kryesor në rritjen e fëmijëve të tyre.
Uroj për këtë 8 mars nënat e mira, ato që kujdesen, duke dhënë shembullin personal, të sjellin në botë fëmijë të mbarë, që të kontribuojnë në përmirësimin e jetës së familjes dhe komunitetit.

Uroj për këtë 8 mars ato nëna që e pranojnë fëmijën e tyre ashtu siç është, të aftë ose të paaftë të bëhet “dikush” në jetë, por i aftë të mos lëndojë askënd.
Uroj ato nëna që në çdo hap të jetës së tyre u kanë thënë fëmijëve të mos grabisin, të mos bëjnë keq, të ndjekin pasionin dhe talentin që u ka falur natyra, pa i shkelur askujt në këmbë.

Uroj shumë ato nëna që mësojnë fëmijët e tyre të mos ulin kokën kurrë përballë vështirësive, por të përulen e të dinë të thonë “më fal”, kur gabojnë.
Uroj shumë ato nëna që mësojnë fëmijët e tyre të flasin, por dhe të dëgjojnë, të pretendojnë të drejtat, por dhe të jenë të përgjegjshëm për çdo hap që bëjnë.

Këtë 8 mars dëshiroj të uroj nga zemra vetëm Nënat e mira.