Vetëm tre fotografi në varrim, por serbët e vrarë ishin katër! Ja pse e fshehin një nga agresorët e sulmit në Banjskë

Gjashtë ditë pas sulmit terrorist në veri të Kosovës, trupat e pajetë të agresorëve serb të cilët qëlluan drejt Policisë së Kosovës, duke i marrë jetën një efektivi i janë dorëzuar familjarëve të tyre.

Ndonëse të vrarët janë katër, kishte vetëm 3 fotografi në “ditën e zisë” që organizoi në Mitrovicë, Lista Serbe, për terroristët e vrarë nga Policia e Kosovës.

I vrari i katërt që ishte po ashtu pjesëmarrës i atij akti terrorist, është Bojan Mijailoviç, truproja e shefit të BIA-s serbe, Aleksandar Vulin.

Arsyeja pse fotografia dhe trupi i tij nuk ishte pjesë e ‘zisë’ është se donin të mbanin të fshehur identitetin e personit të katërt, i cili ka shoqëruar Vulin edhe në vizitën e tij në Republikën e Kosovës në vitin 2013.

“Shteti i Serbisë është këmbë e krye i përfshirë në këtë sulm terrorist me qëllim destablizimin e Republikës së Kosovës. Për këtë gjë tashmë ekziston edhe lidhja formale e strukturore e përfshirjes së Aleksandar Vuçiç në sulmin e 24 shtatorit në Banjskë të Zveçanit: Milan Radojçiç, si nënkryetar i Listës serbe dhe trupëroja e Aleksandër Vulinit, shef i BIA-s. Të dy këta po ashtu të sanksionuar në listën e zezë të ShBA-ve. Të dy këta nga njerëzit më të afërt të presidentit të Serbisë” –  tha për mediat Xhelal Sveçla, ministër i Brendshëm i Kosovës.

M.T/Shqiptarja.com

TAG:
• tensione ne veri te kosoves
• vritet polici ne kosove
• serbi
• kosove