Gjatë takimit elektoral me mbështetësit në Delvinë, Rama u shpreh gjykatësit duan rrëzimin e ligjit që do hetojë pasuritë e tyre.
Rama iu referua rastit të deklarimit të pasurive nga një Prokuror me 8 shtëpi të cilat i ka justifikuar si të falura nga familjarët.
“Unioni i gjykatësve si skutha, tani që ne jemi në fushatë, shkuan në Gjykatë Kushtetuese, ne këtej në fushatë, për të rrëzuar pikën themelore të Vettingut.
A e patë një prokuror para disa ditësh, 8 shtëpi kishte?
Njeriu më me fat në botë. Mirë vjehrra që e donte shumë, edhe xhaxhai ia ka falur një shtëpi, por edhe komshiu ia kishte falur një shtëpi. Ky ishte njeriu më me fat në botë.
Vettingu do e kontrollojë ka pasur apo s’ka pasur vjehërr, ka motër apo jo në Australi. Ka lekë motra që i dha shtëpinë? Pse ia dha shtëpinë?
Dhe tjetra, kanë apo nuk kanë lidhje me krimin. Këtë e kanë çuar në Gjykatën Kushtetuese. Nuk duan të kontrollohemi, pse na paragjykoni, po na shkelni të drejtat e njeriut. Kontrollohu dhe dil i pastër, ata thonë na shkel të drejtat. Është një reformë që do ta çojë thikën në palcën e korrupsionit dhe nuk i ndahemi”, u shpreh Rama.
Kreu i qeverisë kërkoi votat për PS-në në mënyrë që të qeverisë e vetme pas 25 qershorit, për të vijuar betejën kundër korrupsionit.
“Na jepni fuqi që të mos i ndahemi, që jo të kemi timonin e pushteti për të çuar makinën e pushtetit nëpër arat e babait, por të na jepni fuqi që të mos na kërcënojnë të tjerët se do të na hedhin në erë duke tundur timonin”, tha Rama.
Redaksia Online
l.q/Shqiptarja.com