VIDEO/ Aksident tragjik në Turqi, përplasen 7 automjete, 10 viktima dhe 59 të plagosur

Një aksident tragjik ka ndodhur në Turqi, ku 10 persona kanë humbur jetën dhe 59 janë plagosur, si pasojë e përplasjes së 7 automjeteve në provincën Sangari.

Sipas mediave, aksidenti fatal ka ndodhur në autostradën e Marmarasë rreth orës 4:30 të mëngjesit dhe dyshohet se shkak ka qenë mjegulla e dendur që kishte mbuluar zonën.

Shtatë automjete, duke përfshirë 3 autobusë dhe 1 kamion, u përfshinë në aksident, e cila duket se ka nisur kur një makinë ka përplasur një kamion, raportojnë mediat turke.

Pas përplasjes së parë, disa pasagjerë kanë zbritur nga makinat e tyre për të parë se çfarë ka ndodhur dhe janë goditur nga automjetet që i kanë ardhur me shpejtësi, sipas guvernatorit të Sangario, Yasar Karadeniz.

Shtatë nga personat e plagosur ndodhen në gjendje të rëndë, ndërsa forca të shumta zjarrfikëse dhe policie ndodhen në vendngjarje dhe po hetojnë rrethanat e aksidentit.

Guvernatori i Sakaryas duke folur në transmetim të drejtpërdrejtë pas aksidentit të tmerrshëm u shpreh se shumë nga viktimat humbën jetën pasi dolën nga automjetet e tyre dhe u përplasën nga të tjera automjete që nuk kishin fushëpamje.

Guvernatori Karadeniz deklaroi më tej se, të plagosurit janë dërguar në spitale dhe puna e ekipeve në rajon vazhdon. Ekipet vijojnë largimin e automjeteve nga rruga në rajonin ku ka mjegull të dendur.

"Aksidenti është shkaktuar fillimisht nga përplasja e disa makinave me kamionë të tonazhit të rëndë. Mendohet se disa nga personat që kanë humbur jetën në aksident kanë zbritur nga automjetet e tyre dhe janë goditur nga mjete të tjera që vinin nga pas”, tha për mediat guvernatori.

 

S.S/Shqiptarja.com

TAG:
• turqi
• Aksidenti