Kryeparlamentari Ilir Meta shprehu edhe njëherë mbështetjen ndaj Prokurorisë për t’i cuar deri në fund hetimet për vjedhjen e thesarit.
Ndërsa deputeti socialist Xhemal Qefalia thotë se për t’i shkuar deri në fund këtij skandali duhet një qëndrim radikal, ndërsa shton se guvernatori i Bankës së Shqipërisë Ardian Fullani duhet të jepte dorëheqjen për vjedhjen e 713 milionë lekëve të rinj nga thesari i shtetit.
Kreu i komisionit parlamentar të Sigurisë, Spartak Braho, njëherësh deputet i Lëvizjes Socialiste për Integrim thotë se tashmë kjo cështje i takon Prokurorisë dhe duhen pritur rezultatet e saj.
Deputetë të tjerë janë shprehur gjithashtu për mikrofonin e A1 REPORT
Kryetari i Kuvendit, Ilir Meta: Mbështesim Prokurorinë për hetimet
“Ne jemi në mbështetje të plotë të prokurorisë për t’i çuar hetimet deri në fund”.
Xhemal Qefalia: Duhet reagim radikal, Fullani të ishte dorëhequr
“Personalisht duhet të këtë një qëndrim radikal për t’i shkuar deri në fund kësaj po përsa kohë Prokuroria është duke u marrë besoj se Prokuroria do të nxjerrë një vendim përfundimtar, do ishte e ndershme që Fullani të jepte dorëheqjen”.
Anastas Angjeli: Organet e drejtësisë po bëjnë punën e tyre
“Qëndrimet e mia ndaj kësaj çështje i kam mbajtur në komisionin e Ekonomisë dhe unë kam besuar dhe besoj se organet e drejtësisë po bëjnë punën e vet dhe natyrisht në kohën e duhur institucionet përkatëse do mbajnë qëndrimin e duhur në përputhje me ecurinë e këtyre hetimeve dhe me vendimet e organeve. Për ndjeshmëri pyesni zotin Fullani”.
Ylli Zecishti: Faji është i Fullanit, duhej të ishte dorëhequr me kohë
“Duhet ta jepte me kohë dorëheqjen, faji është se ai është drejtuesi i një institucioni kështu dorëheqjen duhet ta japë patjetër”
Spartak Braho: Ta lëmë Prokurorinë të hetojë
“Kjo është një çështje që ne duhet të lemë rehat Prokurorinë. Është Prokuroria që duke hetuar dhe që presim rezultatet e këtij hetimi”
Redaksia Online
(Shqiptarja.com)