Portieri veteran i Kepit të Gjelbër, Vozinha, është një nga emrat më të përfolur të Kupës së Botës 2026, pas paraqitjes spektakolare në barazimin historik 0-0 ndaj Spanjës.

40-vjeçari ishte heroi absolut i kombëtares afrikane në ndeshjen debutuese të turneut, duke realizuar shtatë pritje vendimtare dhe duke mbajtur të paprekur portën përballë një prej skuadrave favorite për trofeun.

Megjithatë, surpriza më e madhe për Vozinhën erdhi pas përfundimit të takimit. Gjatë një interviste televizive, portieri u informua se fama e tij kishte shpërthyer në rrjetet sociale brenda vetëm pak orësh.

Në fillim të ditës, gardiani i Kepit të Gjelbër numëronte rreth 50 mijë ndjekës në Instagram, ndërsa pas performancës heroike ndaj Spanjës, shifra kishte kapërcyer mbi 2 milionë ndjekës. Reagimi i tij i sinqertë dhe habia për popullaritetin e papritur u bënë menjëherë virale në internet.

Aktualisht, Vozinha aktivizohet te Chaves në Portugali, ndërsa gjatë karrierës së tij ka luajtur edhe në kampionatet e Sllovakisë, Qipros, Moldavisë dhe Angolës. Pas mbrëmjes magjike ndaj Spanjës, emri i tij tashmë është bërë i njohur në mbarë botën.


Lajmi kryesor:

Debutoi në Botëror në moshën 40-vjeçare dhe u shpall 'Lojtari i ndeshjes' kundër Spanjës, Vozinha në lot: U emocionova kur kujtova familjen