Serie A e futbollit në Itali zhvilloi të dielën pesë nga ndeshjet e raundit të 25-të. Sassuolo fitoi 1-2 kundër Udineses, Cremonese dhe Genoa barazuan 0-0, Parma mposhti 2-1 Veronën, ndërsa Torino humbi 1-2 në shtëpi nga Bologna. E diela kulmoi në orën 20:45, me Napolin dhe Romën që barazuan 2-2.

Në 'Maradona', vendasit e Napolit nuk u dorëzuan paçka se Roma kaloi në epërsi pas shtatë minutave lojë me Donyell Malen. Fundi i pjesës së parë solli golin e barazimit për Napolin me një ish si Spinazzola. Mbrojtësi lëshoi një të djathtë potente nga jashtë zone, me sferën që u devijua lehtë, mjaftueshëm sa për të nxjerrë nga trajektorja portierin Svilar.

Në pjesën e dytë një pakujdesi e Rrahmanit në zonë i dha 11 metërshin Romës, me të përhershim Malen që u tregua i saktë dhe dyfishoi për të besuarit e Gasperinit. Në momentin që shkaktoi faullin, Rrahmani u dëmtua dhe u zëvendësua nga Alisson Santos, afrimi i janarit.

Ishte pikërisht braziliani që ndezi shkëndijën e sulmit te Napoli dhe në minutën e 82-të ia doli të barazonte shifrat për 2-2. Napoli me 50 pikë mbetet në vendin e tretë të renditjes në Serie A, ndërsa Roma me 47 pikë ndodhet në vendin e katërt, një pikë para Juves.

Tabelën e Serie A e kryeson Interi me 61 pikë, tetë më shumë se Milani ndjekës, por kuqezinjtë kanë një ndeshje më pak, atë kundër Comos e cila luhet më 18 shkurt.

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 18 Prill, 08:22

    Si ju duk strategjia e drejtorit Hita në organizimin e policisë gjatë protestës së PD?

Lajme të tjera