Kombëtarja shqiptare e futbollit, e drejtuar nga trajneri Sylvio Mendes Campos Junior do të udhëtojë në transfertën e Pragës, ku do të luajë me Republikën Çeke më datën 7 shtator, ndërsa tre ditë më pas më 10 shtator është sfida e dytë me Poloninë, që do të luhet në stadiumi “Air Albania” të Tiranës. Duelet janë të vlefshme për grupin E kualifikues të Europianit 2024, me tanët që momentalisht mbajnë vendin e dytë në grup.
Në prag të këtyre dueleve, sulmuesit kuqezinj janë "ndezur" duke gjetur rrjetën me skuadrat përkatëse. Në Conference League, Ernest Muçi shënoi në sërinë e penalltive për Legian, me polakët që siguruan një biletë për në grupe.
![](https://shqiptarja.com/template/img/NO_ALFA_Kuadrate shqiptarja.png)
Giacomo Vrioni, edhe pse nuk pritet të ketë një ftesë nga Sylvinho, ka shënuar në MLS amerikane të futbollit. New England Revolution fitoi 1-0 me New York Red Bull për javën e 25-të në MLS amerikane të futbollit. Ndeshja u vendos në minutën e 30-të të pjesës së parë me gol të Giacomo Vrionit. Sulmuesi i Kombëtares mori një pasim fantastik nga Kaye dhe pas afro 50 metrave sprint, rregulloi topin dhe me një goditje me të majtën e ndali sferën në rrjetë, për golin e gjashtë sezonal.
Gol edhe nga Armando Sadiku në Indi. Elbasanasi po kthehet në lojtar vendimtar për Mohun Baganin. Sulmuesi shqiptar ka shënuar një gol spektakolar në ndeshjen e fundit kundër Goas. Lojtari nga Elbasanim mori bukur topin dhe goditi fuqishëm portën, duke e lënë të shtangur portierin kundërshtar. Mohun Bagani fitoi me shifrat 2-1 ndaj Goas, duke siguruar kështu biletën për të finale të Durant Cup.
Te goli doli edhe sulmuesi Taulant Seferi. Futbollisti nga Kumanova duket se është abonuar me golin në Emiratet e Bashkuara Arabe. Sulmuesi i kombëtares shqiptare, ka realizuar golin e dytë radhazi me fanellën e Bani Jas në ndeshjen e Kupës ndaj Al Jaziras. Miqtë shënuan dy herë në pjesën e parë me Fernando dhe Traore në minutat 21 dhe 26, ndërkohë që po në pjesën e parë skuadra e Seferit arriti të vendoste baraspeshën.
Me Kombëtaren që ka nevojë për gola, duke shtuar formën e mirë të Uzunit dhe Asanit, Sylvinho tanimë duhet të hedhë në fushë një ekip sulmues për të marrë më të mirën në dy ndeshjet e radhës, që janë vendimtare për fatet e kuqezinjve në Euro 2024.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)