“Videoja” e dytë e “Babales”, tregon më shumë se e para!

Partia Demokratike po zhytet përditë e më shumë në spiralen e një historie të sajuar keq dhe dhe sot heronjtë e saj, janë dy kunetër ordinerë nga Vlora, të cilët vetëm një gjë nuk përgënjeshtrojnë në çdo histori, që duan lekë për atë që thonë.

I pari, heroi kryesor i PD, është në duart e Policisë së Kosovës dhe pritet të ekstradohet në Shqipëri, ndërsa i dyti, është në duart e Policisë në Tiranë.

Pasi është mësuar nga PD, se ai ka telefonuar policinë me dëshirë të tij dhe ka dëshmuar sipas kodit të procedurës penale para prokurorit, duket se ka pasur një telash të ri nga njeriu më i afërt i Lulzim Bashës.

Badigardi i tij, që dikur ka drejtuar Policinë Bashkiake të Tiranës, ka sajuar atë që quhet “Babale 1”, fraksion 2.

Ai shihet qartë në video, që më shumë se sa të pyesë, ka hall që Alizoti të pohojë pyetjet e tij të tipit, “ishte dhe Taulant Balla aty”, “Ishte Ard Veliu” etj.

Në fakt, videoja e dytë është më e rëndë se e para.

E dyta është më e rëndë, pasi tregon se operacionin e dytë, e ka drejtuar vetë Lulzim Basha.

Pasi ka rënë në panik nga denoncimi që ka bërë Alizoti në polici për historinë e “Babales”, Lulzim Basha ka kërkuar jo vetëm frikësimin e tij, por praktikisht e ka marrë peng përmes badigardit të tij, të quajtur “gishtpremi”.

Rrëmbimi i dhunshëm nga badigardi personal dhe familjar i Lulzim Bashës, tregon se në krye të këtij operacioni nuk qëndron Salianji, ai është thjesht një ushtar.

Operacioni drejtohet nga vetë Lulzim Basha, dhe se ai ka tentuar të marrë edhe kontrollin për sigurinë e alibisë, pas dekonspirimit të “Babales”.

Videoja e dytë është më e rëndë se e para, pasi provon që videoja e parë, ka qenë një fallsifikim me vetëdije dhe tani është bërë urgjente të deklasohen personazhet, duke thënë që ata janë jo seriozë dhe siç na kanë gënjyer ne, mund të gënjejnë dhe Prokurorinë.

Videoja e dytë në fakt është një akt i mirëfilltë i përpjekjeve për fshehje të krimit dhe prishje të provave, nga vet Lulzim Basha.

Është ku e ku më larg, se akuzat e Bashës që “Xhisiela po flet nën presion” se është e kërcënuar.

Alizoti duket jo vetëm i kërcënuar, por i terrorizuar nga badigardi i Lulzim Bashës, që e merr në pyetje.

Nga ana tjetër, videoja e dytë hedh dritë mbi gjithë sistemin e falsifikimit përmes kasetave  të Lulzim Bashës, pasi lidh disa histori bashkë.

Një detaj që tregon se tek historia e Xhisielës dhe policit Nuhu, si dhe tek kaseta e Alizotit, është e njëjta dorë, është detaji që lidhet me Taulant Ballën.

Siç po del, ky regjistrim është bërë diku nga qershori, kur u mor vesh që kunati i “Babales” ka denoncuar skandalin në Prokurori.

Qysh atëhere, Basha ka vënë në fokus Taulant Ballën dhe mes pyetjeve të imponuara, duket që është dhe ajo për Taulant Ballën.

Ndërkohë, ky operacion dekonspiron dhe skenarin e policit Nuhu, të cilit po ashtu si Alizotit, i është imponuar përmendja e Ballës.

Pra, vetë emri i Taulant Ballës në të dy kasetat, si të policit Nuhu, dhe të Alizotit, tregon se ato janë bërë nga një dorë, kanë një ide dhe tipologji, dhe janë strategjia me të cilën Basha po tenton të prodhojë një steriotip negativ të kundërshtarit përmes kasetave të prodhuara në SHQUP.

Në fund, videoja  e dytë tregon dhe degradimin e nivelit të PD dhe personazheve në dorë të të cilëve ka mbetur.

“Babalja” dhe kunati i tij janë personazhe të rekrutuar nga PD për aksion politik në Vlorë.

Dikur në atë qytet PD ka pasur Ibrahim Vasjarin, Elham Sharrën, Roland Tafilin apo Gëzim Zilen, dhe ka fituar me ta edhe në mars 1991, ndërsa sot ka “Babalen” dhe Alizotin, dhe nuk merr dot as dy deputetë në gjithë Qarkun. Dhe kjo, falë mënyrës se si Lulzim Basha e ndërton politikën, duke bërë partner jo demokratët apo personalitet me integritet, por llumin e qytetit.

Pra ajo që është e re nga videoja e dytë, është se na tregon më shumë se çfarë dinim për videon e parë të “Babales”, na tregon se në PD ekziston një grup që merret vetëm me prodhim videosh për kundërshtarët, të gjitha të sajuara, dhe mbi të gjitha na tregon se Lulzim Basha është në krye të këtij operacioni.

“Video-montazhet” janë të vetmet ide të tij politike dhe të vetmet mjete politike që po përdor deri më sot.

Për të qenë të sinqertë, as videot nuk janë ide e tij, por të kunatit, pasi kompania e kunatit të vet, ka investuar boll para në këtë fushë.

Ai video shet, ose si reklamë dhe gjoba për biznesin, ose si gjoba për politikën. /TemA

TAG:
• lulzim basha
• PD
• taulant balla
• vlora
• Babales
• Ard Veliu