TIRANE - Vijon puna në sheshin “Nënë Tereza” në Tiranë, për prishjen objekteve si pjesë e planit për restaurimin e sheshit në kuadër të pritjes së ardhjes së Papa Françeskut. Edhe ditën e sotme, Inspektoriati Ndërtimor Urbanistik Kombëtar, ka nisur prishjen e disa objekteve tek “Nënë Tereza”, ndërsa puna e fadromave të INUK mësohet se vijon pa probleme dhe kontestime nga ana e pronarëve.

Aktualisht, INUK ka nisur punën sot me prishjen e një objekti dykatësh. Në një prononcim për mediat, Drejtor Rajonal i Kulturës Kombëtare, Ledion Lako tha se aksioni i sotëm konsiston në prishjen e 7 objekteve, ndërsa shprehu bindjen se restaurimi i sheshit "Nënë Tereza" do të përfundojë brenda afateve të përcaktuara. 

inuk tirane
(Në foto: Aksioni i INUK në sheshin "Nënë Tereza)

"Bëhet fjalë për 7 objektet dhe ky është projekti i miratuar dhe detyra jonë është të pastrojmë. I gjithë perimetri do të zhvillohet dhe do të ketë gjelbërim. Ne po zbatojmë vendimin e marrë për projektin e restaurimit. Detyra jonë është të marrim të gjitha vendimet që kanë të bëjnë me Këshillin Kombëtar të Restaurimeve dhe ne do të mbarojmë punën brenda afateve të caktuara." tha Lako