Lufta në Ukrainë, pas takimit me Erdogan, Vjosa Osmani kërkon anëtarësimin e Kosovës në NATO

Në një kohë kur Rusia ka shtuar sulmet në Ukrainë, presidentja e Kosovës, Vjosa Osmani, i ka kërkuar presidentit të Turqisë, Recep Taip Erdogan, gjatë një takimi të zhvilluar ditën e sotme, që të ndihmojë Kosovën për anëtarësim në NATO. 

'Duke pasur parasysh situatën në Ukrainë, ka ardhur koha që Kosova të anëtarësohet në NATO! Kosova duhet të anëtarësohet në NATO, ku Turqia ka rol të rëndësishëm dhe e falënderoj presidentin Erdogan për punën në këtë drejtim. Në kuadër të NATO-s Turqia mund të bëjë shumë duke i dhënë përkrahje Kosovës', ka thënë ajo.   

Kujtojmë se Serbia nuk ka pranuar të vendosë asnjë sanksion ndaj Rusisë si dhe nuk e ka dënuar agresionin e saj në Ukrainë.

Osmani ka thënë se vetëm njohja reciproke me Serbinë garanton paqe dhe stabilitet në rajon. Ndërsa Erdogan ka thënë se Turqia e mbështet dialogun me Serbinë. “Është me rëndësi një Marrëveshje gjithëpërfshirëse. Ne jemi të gatshëm të bëjmë më të mirën për paqen në rajon”, ka thënë ai.

Ai ka thënë se vizita e Osmanit në Turqi do të shërbejë për të thelluar miqësinë mes dy vendeve. “Diskutuam të gjitha aspektet e marrëdhënieve tona, shkëmbyem mendime për situatën në rajonin tonë dhe në Ukrainë”, ka thënë ai, duke theksuar se Turqia i kushton rëndësi forcimit të Kosovës në arenën ndërkombëtare.
 

M.Q./Shqiptarja.com

TAG:
• serbi
• rusia sulmon ukrainen
• nato
• Recep Tayyip Erdoğan
• turqi
• Vjosa Osmani