Vllaznia në krizë, Osmani: Asnjë përplasje në dhomat e zhveshjes, me Laçin duam tri pikët

SHKODËR - Vllaznia dhe Laçi luajnë nesër në 17:00 për javën e 13-të në "Loro Boriçi". Superliga ka filluar është vështirësuar për shkodranët, që edhe pse me trajnerin e ri ende nuk kanë dalë te tri pikët.

Për mediet, Qatip Osamani ka thënë se nuk ka pasur asnjë zënkë mes lojtarëve në dhomat e zhveshjes dhe se kanë punuar për të evituar gabimet që i shfaqën në humbjen 4-1 kundër Partizanit.

"Situata në dhomat e zhveshjes? Nuk ka pasur asnjë përplasje. Ndoshta një shqetësim për atë lojë me Partizanin, por çdo gjë normale pas një loje që e humbën. Shikoj një shqetësim për këto rezultate që janë. Jemi munduar që me biseda individuale, me qëllim sa më të gatshëm të presim lojën me Laçin. Ato elemente që u shfaqën në lojë, i kemi punuar këto ditë. Momentalisht ekipit i duhet një qetësi maksimale për lojën me Laçin. Ne kemi pasur shumë gabime individuale", tha Osmani.

LEXO EDHE:
Prag sezoni turistik, dezinsektimit do të nisë nga Shkodra! Koçiu: Gati për sezonin! Beci: Në kohën e duhur

Më pas trajneri foli edhe për mënyrën sesi skuadra pëson golat, si edhe ndryshimet që do ndodhin në ekip.

"Golat që i pësuam nga këto gabime erdhën. Për mendimin tim nuk duhet t’i pësonim ato gola. Edhe kartoni i Bekim Balajt dhe lëndimet na detyrojnë të ketë ndryshime. Do të ketë, por jo shumë. Edhe Smajli dhe Mala janë lojtarë kualitativ. Megjithatë edhe këto zëvendësimet që i kemi duhet t’i përkrahim dhe të hyjmë në fushë maksimalisht të mobilizuar. Opsioni është fitorja", vijoi trajneri.

I afruar vetëm dy javë më parë në Shkodër, Osmani cek edhe objektivat si dhe rivalët e Laçit.

"Besoj se mundësitë janë për katërshe. Vendi i katërt me të fundit janë tre pikë diferencë. Kampionati është i tillë që me një seri fitoresh merr një krah tjetër. Ne mendojmë vetëm për fitore. Laçi është një ekip taktikisht shumë i disiplinuar. Lojërat që ka humbur, nuk i ka humbur me më shumë se një gol diferencë. Megjithatë Vllaznia ka kualitet për ta fituar këtë ndeshje”, u shpreh tekniku Osmani.

Pas 12 ndeshjeve, Laçi me 15 pikë mban vendin e katërt, ndërsa Vllaznia me 13 pikë vendin e tetë. Te Vllaznia për ndeshjen e nesërme nuk do jenë Balaj dhe Mala.

S.DH/Shqiptarja.com

TAG:
• superliga
• Shkoder
• Vllaznia
• Laçi
• qatip osmani