Votimi me 84 vota në Kuvend, PS
nesër përballet me 'rebelët' e partisë

TIRANE- PS do të nisë nesër përpjekjet për gjetjen e konsensusit për votimin e ligjeve që kërkojnë të paktën 84. Dështimi i seancës të së enjtes ka sjellë dhe përplasjen e parë mes deputetëve dhe ministrave të qeverisë Rama, ku të paktën 5 deputetë shprehën hapur pakënaqësinë e tyre. Por se seanca e datës 31 është e fundit për këtë legjislaturë ndaj dhe arritja e 84 votave cilësohet tepër e nevojshme. Aq më shumë kur reforma territoriale është konsideruar si një vendim i rëndësishëm prej mazhorancës.

Por duket se deputetët e konsideruar “rebelë” kanë këmbëngulur në qëndrimin e tyre, i cili pritet të jetë pjesë e diskutimeve në mbledhjen e grupit parlamentar, e cila ishte parashikuar të zhvillohej ketë te marte ne oren 13:00, por u shty per te merkuren ne te njejten ore.

Deputeti Pjerin Ndreu ka publikuar një foto faqen e tij në facebook ku shfaqet me deputetin Parid Cara dhe Armando Prenga. Të tre deputetët nuk kanë qenë pjesë e seancës së shkuar parlamentare. Ndërkohë që dhe Tom Doshi, deputet i PS, dhe Mark Frroku PKD duket se nuk janë tërhequr nga qëndrimi i tyre.

Aq më shumë dhe Vangjel Dule, i cili ka kërkuar ndryshimin e hartës territoriale në favor të zonave që ai i quan moniritare. Vetë deputetët e PS nuk kanë dhënë se cilat janë pikat që kërkohet të ndryshohen në sjelljen e ministrave apo dhe në ligjet e paraqitura në kuvend. Por duket se pas dërgimit të përfaqësuesve për gjetjen e gjuhës së përbashkët, Rama do të kërkojë që të ti bind në mbledhjen e grupit parlamentar socialistët që kanë shprehur rezerva. Po ashtu bisedime do të ketë dhe me PDIU të cilët po ashtu kanë 5 deputetët e nevojshëm për votimin në parlament.

Shkrimi u botua në Shqiptarja.com (print) në 29 Korrik 2014

Redaksia Online
(d.a/shqiptarja.com) 

/Shqiptarja.com