Votues 16 vjeç, Ruçi - Patozit:
Rregullat janë të mbyllura

TIRANE- Partia Socialiste refuzon nismën e kryetarit të mazhorancës, njëkohësisht kryeministër i vendit, Sali Berisha për përfshirjen në procesin e votimit të zgjedhjeve të 23 qershorit të 16 vjeçarëve.  Nisma iu prezantua sot zyrtarisht socialistëve gjatë një takimi të zhvilluar mes kryetarit të grupit parlamentar të PD-së Astrit Patozi dhe Gramoz Ruçit, kreu i grupit parlamentar të PS-së.

Takimi me dyer të mbyllura u zhvillua paraditen e sotme në kryesinë e Kuvendit dhe gazetarët mësuan për takimin vetëm pas përfundimit të tij.

Në një prononcim telefonik për TV A1 REPORT, kryetari i grupit të PS-së Gramoz Ruçi pranoi se takimi kishte ardhur me ftesë të Astrit Patozit për të diskutuar nismën për votimin e 16 vjeçarëve dhe shprehu qëndrimin kundër të PS-së pasi rregullat janë mbyllur.

“Tashmë rregullat e lojës janë mbyllur. E drejta e votës për 16-vjeçarët kërkon ndryshim Kushtetues, dhe  rregullat nuk mund të ndryshojnë tre muaj para zgjedhjeve. Nëse do i futemi ndryshimeve të rregullave atëherë ka shumë probleme që duhen zgjidhur, siç është çështja e mos votimit të emigrantëve, ku ende nuk i është garantuar votim, mbi 1 milionë emigrantëve si dhe pastrimi i listave nga te vdekurit dhe dublimet.”

Edhe kreu i grupit PD, Astrit Patozi, i kontaktuar me lidhje telefonike nga gazetarja  e TV A1 REPORT Joniada Koçi tha se biseda me kryetarin e Grupit PS-së kishte zgjatur gati një orë dhe ai kishte propozuar nismën për votimin e 16 vjeçarëve.

“Ruçi nuk pranoi nismën tonë me argumentin se kemi probleme më të mëdha me listat zgjedhore se ulja e moshës së votuesve dhe përfshirja në procesin elektoral të 16 vjeçarëve.” - tha Patozi.

Nga ana e tij kryeministri Berish tha në mbledhjen e sotme të qeverisë se do të luftonte deri në fund që 16 vjeçarëve t'u siguronte votën. “I siguroj 16- vjecarët e këtij vendi se s’do ndaloj kurrë përpjekjen time derisa ata të votojnë si të barabartë me qytetarët e tjerë”, -  deklaroi Berisha, i cili në krah të tij për këtë nismë ka dhe Lëvizjen Socialiste për Integrim. Ndërkohë që dje OSBE deklaroi se nuk kishte kohë të mjaftueshme për ta ndërmarrë për zgjedhjet e 13 qershorit. Ndërsa, përfaqësues të shoqërisë civile deklaruan se 16-vjeçarët janë "fëmijë”.

Për të lejuar votimin e 16 vjeçarëve duhet ndryshuar Kushtetuta e cila lejon votimin mbi 18 vjeç, dhe ndryshimet kushtetuese mund të bëhen vetëm me konsensusin e opozitës pasi këto ndryshime kërkojnë shumicë të cilësuar.
(sg/shqiptarja.com)

TAG:
• gramoz ruçi
• OSBE