Vranë 25-vjeçarin shqiptar në Athinë 16 vjet më parë, arrestohen dy autorët në Korçë! Do ekstradohen drejt Greqisë (Emrat)

Gëzim Latja, 41 vjeç dhe Armando Tarushllari (Jetnor Cinellari) 52 vjeç, janë arrestuar nga policia e Koçës në bashkëpunim me autoritetet greke si bashkëautorë të vrasjes së 25-vjeçarit Arjan Xhambazi në Athinë në vitin 2008.

"Bashkëpunimi dhe hetimet e përbashkëta mes Drejtorisë Vendore të Policisë Korçë me homologët e Athinës, si dhe mes prokurorive respektive çoi në identifikimin dhe ndalimin e dy shtetasve të dyshuar si bashkëautorë të vrasjes së një 25-vjeçari shqiptar në Athinë, ngjarje e ndodhur në vitin 2008. Strukturat Hetimore të Drejtorisë Vendore të Policisë Korçë në zbatim të letër porosisë të dërguar nga Athina me qëllim identifikimin e dy autorëve të tjerë të ngjarjes së ndodhur më datë 06.12.2008, në bashkëpunim me Prokurorinë rihapën hetimet për identifikimin e dy bashkautorëve të tjerë të vrasjes së 25-vjeçarit", njofton policia.

Në vitin 2008 gjatë një konflikti për motive të dobëta, mbeti i vrarë Xhambazi dhe u plagos një tjetër dhe për këtë ngjarje autoritetet greke mundën të identifikonin dhe ndalonin vetëm njërin prej tre autorëve të dyshuar të ngjarjes.

Si rezultat i hetimeve Policia e Korçës, në bashkëpunim me Prokurorinë e Korçës, bëri të mundur identifikimin dhe ndalimin e shtetasve: Gëzim Latjas  banues në Elbasan dhe të Armando Tarushllari, banues në Tiranë, për të cilët Prokuroria kishte nxjerrë urdhër ndalimi për veprën penale "Vrasja me dashje", kryer në bashkëpunim. 

Vijojnë hetimet e përbashkëta në lidhje me dokumentimin e plotë të ngjarjes dhe ekstradimin e tyre drejt shtetit grek. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë.

B.K/Shqiptarja.com

TAG:
• Arjan Xhambazi
• greqi
• Korce
• Armando Tarushllari
• gezim latja