Atentati me tre viktima në afërsi të Stacionit të Trenit më 27 Maj 2015 sipas prokurorisë së krimeve të rënda është kryer për gjakmarrje.

Hetimet për ngjarjen ku mbetën të vdekur Mentor Lufi (Doci), Gerti Goxhaj dhe Besnik Sulku kanë përfunduar dhe prokuroria kërkon që gjykata të dënojë autorët e dyshuar.

Për krimin në prangat e policisë janë 3 shtetas mes tyre dhe italiani Salvatore Letizia i cili rezulton se është përfshirë direkt në vrasjen e Gerti Goxhajt dhe vrasjen për gjakmarrje të Mentor Luci (Doci).

Ky krim nga hetimet e policisë e ka zanafillën nga një palgosje e ndodhur në Tiranë pranë stadiumit "Dianmo" e vazhduar në Prill 2015 me një vrasje në Holandë e rikthyer sërish me vrasje në Tiranë pak javë më pas më 27 Maj 2015.

Tashmë pritet që gjykata të vleftësojë provat e prokurorisë dhe të jap verdiktin për autorët e dyshuar Markeljan dhe Klevi Doci si dhe italianin Salvatore Letizia.

Por si nisi përplasja armatosur?
Në dhjetor 2014 Mentor Lufi plagosjet me armë zjarri në Tiranë. Këtë plagosje Lufi ja faturoi vëllezërve Durim e Besnik Sulku, me të cilët prej kohësh kishin raporte shoqërore në Holandë.

Pak muaj më pas Lufi për tu hakmarrë organizoi një atentat ndaj Durim Sulkut në Holandë e përkatësisht në Ridderkerk, atentat nga i cili Durim Sulku gjeti vdekjen.

Ky krim nga hetimet e përbashkëta Holandeze Shqiptare rezultoi se ishte kryer me porosi të Lufit dhe zbatuar nga dy nipërit e tij Markelujan e Klevi Doci, të cilët po ashtu u përfshin dhe në krimin e ndodhur tek stacioni i trenit me 3 viktima.

Deri në momentin e krimit të ndodhur te Stacioni i Trenit vrasja e Durim Sulkut në Holandë do të ishte mister për forcat e policisë, por kjo s'kishte penguar Besnik Sulkun të hakmerrej pasi ai e dinte kush i kish vrarë vëllain.

Ka mjaftuar ekspertiza e një fije flokë të vëllezërve Doci për të zbardhur krimin i cili më pas u pranua prej tyre se e kishin kryer për hakmarrje pasi vëllezërit Sulku i kishin sulmuar me armë dajën e tyre Mentor Lufi.

Ky konflikt midis Sulkut e Lufit dyshohet se nisi për influencat në trafikun e drogës dhe në 2 vite përplasja me tre atentate prodhoi 4 viktima.

Autorët e atentatit tek Staioni i Trenit
Markeljan Doçi, lindur më 1981, në Bulqizë
2. Klejvi Doçi, lindur më 1993, në Bulqizë,
3. Salvatore Letizia, lindur më 1981, lindur Cazerta (Itali)


Dosja e plote e atentatit me 3 viktima
Prokuroria për Krime të Rënda ka përfunduar hetimet dhe dërgon për gjykim tre persona, dy shqiptarë dhe një italian, të akuzuar si të përfshirë në vrasjen e trefishtë ndodhur në bulevardin “Zogu i Parë”, në Tiranë, në dt. 27.05.2015.

Vëllezërit Markeljan dhe Klevi Doçi, si edhe italiani Salvatore Letizia akuzohen nga Prokuroria për Krime të Rënda se kanë kryer veprime aktive në konfliktin e armatosur, ku mbetën të vdekur shtetasin Mentor Lufi (Doçi), Gerti Goxhaj dhe Besnik Sulku.

Nga hetimet e Prokurorisë për Krime të Rënda është arritur në përfundimin se ngjarja e ndodhur në muajin Maj 2015 në Tiranë është vijim i një konflikti të nisur më parë po në kryeqytet, në Dhjetor 2014 dhe që ka vazhduar në Hollandë, në Prill 2015 e, më tej, është shoqëruar me ngjarjen për të cilën akuzohen tre të pandehurit.

Në bazë të veprimeve hetimore, Prokuroria për Krime të Rënda i paraqet Gjykatës dinamikën e ngjarjes, e cila është rindërtuar në bashkëpunim edhe me autoritetet hollandeze.

Në Dhjetor 2014, shtetasi Mentor Lufi (Doçi) plagoset me armë zjarri në zonën e ish-Stadiumit “Dinamo”, në Tiranë dhe autorët largohen. Shënjestra e atentatit, Lufi, ka dyshuar se sulmi ndaj tij është organizuar nga vëllezërit Durim dhe Besnik Sulku. Ndërmjet Mentor Lufit dhe vëllezërve Sulku kishte nisur një konflikt në Hollandë, ku ata udhëtonin dhe qëndronin shpesh.

Pas atentatit me pasojë plagosjen, Lufi organizon nipat e tij, Markeljan dhe Klevi Doçi, për t’u hakmarrë. Në Prill 2015, dy vëllezërit Doçi i bëjnë atentat me armë Durim Sulkut në qytetin Ridderkerk të Hollandës. Nga veprimet hetimore të autoriteteve hollandeze, rezulton se Durim Sulku gjendej në një automjet tip Smart, kur është qëlluar për vdekje disa herë me pistoletë nga Markeljan Doçi, i cili ishte i shoqëruar nga vëllai i tij, Klevi Doçi, gjithashtu i armatosur.

Pas atentatit në Hollandë, vëllezërit Doçi rikthehen në Shqipëri, duke iu shmangur autoriteteve hollandeze.

Pas thuajse dy muajsh nga vrasja në Hollandë, konkretisht pasditen e  datës 27 Maj 2015, Mentor Lufi, dy nipat e tij Markeljan e Klevi Doçi, si edhe miku i tyre, Gerti Goxhaj, gjendeshin në një lokal pranë Fakultetit të Shkencave, në bulevardin “Zogu i Parë” në Tiranë. Pasi janë ngritur nga lokali, ata kanë hipur në dy mjete dhe konkretisht: Mentor Lufi ishte pasagjer në mjetin e drejtuar nga Gerti Goxhaj; ndërsa vëllezërit Markeljan dhe Klevi Doçi gjendeshin në një automjet pas të parit, ku në timon ishte Markeljani.

Sapo kanë hipur në automjete, në dy pjesët anësore të makinës së parë, janë afruar dy persona të armatosur, të cilët kanë qëlluar personat që gjendeshin në bordin e saj, konkretisht Mentor Lufin (Doçi) dhe Gert Goxhaj. Nga goditjet me armë ka vdekur në vend Goxhaj dhe është plagosur rëndë Lufi, i cili vdiq pak çaste më vonë.

Në momentin e goditjes me armë, Markeljan Doçi afron me shpejtësi makinën drejt atentatorëve, duke përplasur fillimisht njërin prej tyre. Ky i fundit, i cili më pas rezultoi se ishte Besnik Sulku, ka qëlluar me pistoletë në drejtim të mjetit të dytë, por pa u shkaktuar dëme tek vëllezërit Markeljan dhe Klevi Doçi. Të gjendur nën goditjen e armës tip pistoletë nga ana e Besnik Sulkut, Markeljani, gjithashtu i armatosur me pistoletë, ka reaguar duke qëlluar me armë. Markeljani dhe Sulku kanë vijuar të qëllojnë njëri-tjetrin, derisa Besnik Sulku ka mbetur i vdekur, pak metra larg nga automjetet.

Menjëherë pas ngjarjes, forcat e Policisë organizuan operacionin për arrestimin e personave të përfshirë. Fillimisht, në vendngjarje u arrestuan vëllezërit Markeljan dhe Klevi Doçi. Më vonë, pranë një hoteli në atë zonë, u arrestua edhe shtetasi italian, Salvatore Letizia, i cili rezulton se është personi që, së bashku me Besnik Sulkun, ishte pjesë e vrasjes së shtetasve Mentor Lufi dhe Gerti Goxhaj.

Në përfundim të hetimeve, bazuar në kqyrjen e vendit të ngjarjes, provave shkencore dhe bashkëpunimit me autoritetet hollandeze, Prokuroria për Krime të Rënda, ka ngritur akuzat, si vijon:

1. Markeljan Doçi, lindur më 1981, në Bulqizë, akuzohet për kryerjen e veprave  penale të: “Vrasjes me paramendim”,  kryer në bashkëpunim, në dëm të viktimës Durim Sulku (për ngjarjen në Hollandë); “Vrasje e kryer me kapërcim të kufijve të mbrojtjes së nevojshme”, në dëm të viktimës Besnik Sulku; “Mbajtje pa leje të Armëve Luftarake”, dy herë.
2. Klejvi Doçi, lindur më 1993, në Bulqizë, akuzohet për kryerjen e veprave  penale të,  “Vrasjes me paramendim”, kryer në bashkëpunim, në dëm të viktimës Durim Sulku (për ngjarjen në Hollandë); dhe “Mbajtje pa leje të armëve luftarake”.
3. Salvatore Letizia, lindur më 1981, lindur Cazerta (Itali), akuzohet për kryerjen e veprave  penale të , “ Vrasjes me Paramendim” ,  kryer në bashkëpunim, në dëm të viktimës Gerti Goxhaj; “Vrasje për Gjakmarrje”, kryer  në bashkëpunim, në dëm të viktimës Mentor Lufi (Doçi); dhe “Mbajtje pa leje të Armëve Luftarake”.
 
Redaksia Online
Al.N/Shqiptarja.com